Шадар сайд Хүрэлсүх Дундговь аймагт ажиллаж онцгой байдал, мэргэжлийн хяналт, худалдан авах ажиллагаа, стандартчилал хэмжилзүйн газрын үйл ажиллагаатай танилцсан байна.
Өнгөрсөн жил нийслэл хоттой хатуу хучилттай замаар холбогдсоноор жижиг дунд үйлдвэрлэл хөгжих хандлагатай байгаа бөгөөд сөрөг тал нь зам тээврийн осол гэмтэл нэмэгджээ. Аймгийн эмнэлэг болон зам дагуух Дэлгэрцогт, Хулд сумдын эмнэлэг түргэн тусламжий машин дутагдалтай байгааг засаг дарга Шадар сайдад дуулгасан. Шадар сайд салбарынхаа хэрэгцээнээс УАЗ-469 машин нэгийг олгохоо амалсан байна.
Дундговь аймгийн хувьд уул уурхай биш аялал жуулчлал гол хөгжлийн чиглэл гэж үзэж байна. Тиймээс Их газрын чулуу, цагаан суварга зэрэг хүмүүс их ирдэг газруудынхаа зам харгуй дэд бүтцийг сайжруулах, жуулчны баазуудын стандартыг хангахад анхаарч байгаагаа засаг дарга Д.Од-Эрдэнэ танилцуулсан. Аймгийн орон нутгийн хөгжлийн санд энэ жил 4.5 тэрбум төгрөг хуваарилагдсанаас аймагт хоёр тэрбум орчим төгрөг зарцуулахаар болжээ. Энэ мөнгөний нэг хэсгийг жуулчны баазуудад ариун цэвэр, бие засах газар байгуулахад зарцуулах, 300 үнээний ферм барих төслийг санхүүжүүлэх гэнэ.
Аймгийн засаг даргатай уулзсаныхаа дараа Шадар сайд өөрийн эрхлэх асуудлын хүрээнд Онцгой байдлын алба, Мэргэжлийн хяналт, Стандартчилал хэмжил зүй, худалдан авах ажиллагааны газрын ажилтан албан хаагчидтай уулзсан байна.
Худалдан авах ажиллагааны газрын хувьд дөрвөн хүнтэй. Аймгийн хэмжээнд бүх тендер, худалдан авалтыг хариуцан ажилладаг байна. Гол нь ил тод, шударга ажиллахыг Шадар сайд санууллаа. Аймгийн стандартчилал хэмжил зүйн газрын зарим тоног төхөөрөмж муудаж хуучирсан байна. Энэ тал дээр анхаарахыг орон нутгийн удирдлага Шадар сайдаас хүссэн. Стандартчлал хэмжил зүйн газраар очих үедээ салбарын нөхцөл байдалтай танилцсан. Ирэх оны төсөвт хэрэгцээтэй хөрөнгө оруулалтыг суулгах тал дээр анхаарна гэдгээ Шадар сайд хэллээ. Тэрээр аймгийн онцгой байдлын хэлтсээр орж, орон нутгийн гал сөнөөгч, аврагчдын машин техник, багаж хэрэгслийг үзэж сонирхсон байна.
С.СҮРЭН
0 сэтгэгдэл:
Post a Comment