Хөдөлмөрийн сайд С.Чинзориг БНХАУ-аас Монгол Улсад суугаа Онц бөгөөд Бүрэн эрхэт Элчин сайд Ван Шяолуныг өчигдөр хүлээж авч уулзлаа.
Уулзалтын эхэнд Элчин сайд Ван Шяолун "Танай яамны үүрэг хоёр орны худалдаа, эдийн засгийн харилцаанд чухал ач холбогдолтой учраас тантай уулзаж санал солилцох хүсэлт тавьсан юм" хэмээгээд хоёр орны хооронд тогтоосон иж бүрэн стратегийн түншлэлийн хүрээнд хэлэлцэж тохирсон асуудлуудыг бодитой болгох, тодорхой төсөл, буцалтгүй тусламж, зээлийн хөтөлбөрийг хэрэгжүүлэх нь хоёр орны эдийн засгийн харилцаанд онцгой ач холбогдолтой бөгөөд энэ хүрээнд холбогдох хэд хэдэн салбарын хамтын ажиллагааг сайжруулах, түүний дотор ажиллах хүчний асуудал дээр илүү идэвхтэй ажиллах нь эдийн засгийн хямралтай байгаа өнөө үед нэн чухал байгааг онцолсон. Мөн хоёр улсын Засгийн газар хооронд харилцан тохиролцсон, хамтран хэрэгжүүлж буй томоохон төсөл хөтөлбөрүүдэд ажиллах мэргэжилтэй ажилчдын асуудлыг Тэрбээр Хөдөлмөрийн сайдад БНХАУ-аас хуулийн дагуу авдаг ажиллах хүчний тоог нэмэгдүүлэх санал тавьж энэ чиглэлд хамтарч ажиллах хүсэлтэй байгаагаа уламжиллаа.
С.Чинзориг сайд эдийн засаг хямралтай, гадаадын хөрөнгө оруулалт буурсан, дотооддоо ажилгүйдэл нэмэгдэж буй энэ үед БНХАУ-аас авдаг ажиллах хүчний тоог нэмэх боломж байхгүйг тайлбарлаад цаашдаа тус улсаас зөвхөн Боловсролын яамнаас нь олгосон мэргэжлийн үнэмлэхтэй, жинхэнэ мэргэшсэн ажилчдыг л авах бодлого барина гэдгээ хэллээ. Мөн Монгол Улс хөдөлмөрийн зах зээлдээ гаднаас ажиллах хүч авахдаа монгол ажилчдыг дагалдуулан ур чадвар эзэмшүүлэх шаардлага тавих замаар гадны ажиллагсдын тоог бууруулах ёстой гэж үздэгээ ч дуулгасан. Түүнээс гадна хоёр улсын хооронд ажиллах хүч солилцож буй тогтолцоог ч өөрчлөх шаардлагатай хэмээгээд энэ тал дээр Монгол Улсад суугаа Элчин сайдтай хамтарч ажиллахад бэлэн байгаагаа илэрхийллээ.
Г.ДАРЬ
0 сэтгэгдэл:
Post a Comment