2016/03/28

НӨАТ-ын буцаан олголтыг дөрөвдүгээр сард олгоно

Ерөнхий сайд Ч.Сайханбилэг "Шийдлийн цаг" уулзалтын хүрээнд өнөөдөр Гааль, татварын ерөнхий газарт ажиллалаа. Ерөнхий сайдыг очиход НӨАТ-ын баримт хэвлэх машины үнэ тариф, баримтын бүртгэл болоод урамшуулалт сугалааны талаар мэдээлэл өгсөн юм.  

НӨАТ суутган төлөгч найман мянган аж ахуй нэгж НӨАТ-ын хуульд бүрэн хамрагдсан байна. Харин суутган төлөгч биш жижиг дэлгүүр, лангууны 34 хувь нь НӨАТ-ын баримт олгодог болжээ. www.ebarimt.mn сайтад нийтдээ 411 мянган иргэн бүртгүүлжээ.

Ерөнхий сайдын зүгээс дөрөвдүгээр сард багтаан НӨАТ-ын эхний ээлжийн буцаан олголтыг олгох үүргийг Гааль, татварын ерөнхий газарт өглөө. Хуульд заасан хоёр хувийн буцаан олгохын тулд зургаан тэрбум төгрөг шаардлагатайг Сангийн яамнаас тодотгосон юм. Тиймээс энэ хөрөнгийн эх үүсвэрийг Сангийн яам тооцож улсын сангуудаас олгох юм байна.

НӨАТ-ын буцаан олголтоо www.ebarimt.mn бүртгүүлсэн дансаар дамжуулан авах тул дансны дугаараа үнэн зөв эсэхийг шалгах шаардлагатай. Хэрэв таны данс зөрүүтэй байвал яаралтай засах арга хэмжээ авахыг Гааль, татварын ерөнхий газраас санууллаа.

Мөн НӨАТ-ын хуультай холбогдуулж аж ахуй нэгж үнээ нэмэх үндэслэл байхгүй. Урьд нь төлдөг байсан татвараа л тушааж байгаа юм. Хэрэв үнээ нэмсэн тохиолдол гарвал ШӨХТГ-т хандах боломжтойг Гааль, татварын ерөнхий газрын дарга С.Пүрэв санууллаа.  

НӨАТ хэвлэх машин үнэтэй байна гэсэн шүүмжлэлийг аж ахуй нэгж хэлдэг. Тэгвэл таван мянган төгрөгөөр гар утсандаа програм суулгаад уг системд нэвтрэх, 80 мянган төгрөгийн үнэтэй принтер машинаар баримт хэвлэх, томоохон аж ахуй нэгжүүд 200-500 мянган төгрөгийн машин худалдаж аваад НӨАТ-ын хуулийг хэрэгжүүлэх боломж байгааг Ерөнхий сайд Ч.Сайханбилэг хэллээ. Түүнчлэн "Энэ хуулийг илүү энгийн болгож хүмүүст хүргэх, нэг цэгийн үйлчилгээний хэлбэрт оруулах шаардлага байна. Буцаан олголтын хувьд эхний ээлжийн олголтыг дөрөвдүгээр сард багтаан олгох зохион байгуулалтын шийдэл гарга" гэсэн үүрэг даалгаврыг Сангийн яам болоод Гааль, татварын ерөнхий газарт өглөө. Цаашид сүүдрийн эдийн засагт нуугдсан хөрөнгийг илрүүлэх системийг бий болгохын тулд ажиллана гэдгийг Ерөнхий сайд онцолсон юм.

Т.ДАВААНЯМ

Let's block ads! (Why?)

0 сэтгэгдэл:

Post a Comment