УИХ дахь Ардчилсан намын бүлэг өнөөдрийн ээлжит хуралдаанаар хэлэлцсэн асуудлын талаар сэтгүүлчдэд мэдээлэл хийсэнгүй. Бүлгийн дарга Б.Гарамгайбаатараас зарим зүйлийг тодруулахад дараах хариулт өглөө.
-Өнөөдрийн бүлгийн хуралдаанаар юу ярьсан бэ?
-Намрын чуулганы завсарлагааны хугацаанд гишүүд орон нутагт ажилласан, энэ тухайгаа, мөн ямар байдал ажиглагдав гэдэг талаар л ярьсан.
-Хаврын чуулганаар хэлэлцэх анхаарал татах ямар хуулийн төсөл байгаа вэ?
-Бүлгээр энэ асуудлыг сая ярилцлаа. Эхний ээлжинд нэн яаралтай хэлэлцэх ямар асуудал байна вэ гэдгээ гишүүдээс санал авч байж, асуудлаа дараалалд оруулъя гэдгээр ярилцлаа.
-Н.Алтанхуяг гишүүн өчигдөр хүчтэй мэдэгдэл хийсэн. Бүлгийн гишүүд хэрхэн хүлээж авав?
-Бүлгийн төвшинд энэ талаар ямар нэг асуудал яригдсангүй.
-УИХ-ын дэд дарга Р.Гончигдорж Үндсэн хуулийн цэцийн гишүүн болох хүсэлт гаргасан гэдэг мэдээлэл байна. Энэ үнэн юм уу?
-Тийм өргөдөл бичээд өгсөн гэдгийг өчигдөр хэвлэлээс харсан. Тэрнээс албан ёсоор бүлэг дээр ярьсан асуудал байхгүй. Өнөөдрийн бүлгийн хурлаар ч ярилцаагүй.
-Хэрвээ ийм санал орж ирвэл бүлэг дэмжих үү?
-Асуудал нь орж ирээгүй учраас хэлэх боломж алга.
Г.ДАРЬ
0 сэтгэгдэл:
Post a Comment