............хүмүүсийг хорих руу явуулахгүй гэв. Харин цагдаагийн ар гэрийнхэн нь биднийг алж байж авч яваарай хэмээн цагдаа нар руу хашгирч байв
Долоодугаар сарын 1-ний хэргийн гол “буруутан” болсон Ч.Амарболд Ш.Батсүх, О.Зоригт нарыг эмнэлэгт эмчлүүлж байгаа, гэртээ байгаа гэх мэт сураг сүүлийн өдрүүдэд тасарсангүй. Тиймээс дээрх таамаглалыг үнэн эсэхийг сонирхохоор сэтгүүлч миний бие хэвтсэн гэх эмнэлэгт нь очлоо. Тэдний биеийн байдал шүүх хурлын дараа муудсан тул Сүхбаатар дүүргийн нэгдсэн эмнэлэгт хүргэгдсэн, маш хүнд байгаа гэдэг нь ч үнэн болж таарав.
Биднийг тус эмнэлэгт очиход өвчтөнүүд гадаа нарлаж байсан юм. Энэ үеэр өвчтөн И.Даваа “Хурандаа нар энд эмчлүүлж байгаа. Бие нь нэлээд хүнд юм шиг байна билээ. Зөндөө л харуул, хамгаалалт гаргасан. Том дарга нар ч ирж харагдсан. Одоо тэд сэхээнд эмчлүүлж байгаа” гэсэн юм.
Энэ талаар нэмж тодруулахаар дотогш орсон ч эмчилгээний тасаг руу нэвтрүүлээгүй. Цагдаа нар хамгаалалтад гарсан байв. Эмнэлгийн гадаа ч УБҮ, УБЗ улсын дугаартай машинууд харагдсан. Хүлээн авахын ажилтны хэлж буйгаар өвчтөнүүдийн биеийн байдал маш хүнд байгаа учраас олон хүн орж болохгүй гэсэн. Хамгаалалтад гарч байсан Сүхбаатар дүүргийн Цагдаагийн хэлтсийн дэд ахлагч Б.Бат-Орших “Хүмүүсийн бие муу байгаа учраас эмч, сувилагч, ар гэрийнхэн нь л орж байгаа. Одоогоор асуултад тодорхой хариулт өгөх чадваргүй байна. Бид ч та нарт тоймтой зүйл хэлж чадахгүй” гэлээ.
Харин үүнээс хойш хэдхэн цагийн дараа, тодруулбал өчигдөр орой 19:00 цагийн үед хурандаа нарыг Ч.Хосбаяр шүүгчийн шийдвэрээр Цагдан хорих 461 дүгээр анги руу авч явах гэж буй талаар бидэнд мэдээлэл ирж, тус эмнэлгийг зорилоо. Биднийг тус эмнэлэгт очиход цагдаа нар эмнэлгийн бүх хаалгыг хамгаалтад авч, дотогш хүн ойртуулахгүй байв.
Албаны хүнээс энэ талаар тодруулахад “Хурандаа нарын биеийн байдал муу байгаа. Гэхдээ нэгэнт хорих шийдвэр гарсан тул бид тушаал биелүүлэхээс өөр аргагүй шүү дээ. Даанч иргэд энэ бүхнийг ойлгохгүй бидэн рүү дайрч, орилж хашгирч байгаа нь хэцүү л байна. Шүүхээс хорь гэсэн шийдвэрийг өгсөн тул бид яах ч арга алга.
доо хэдэн цагт ачиж явахыг нь хэлж мэдэхгүй байна” гэлээ. Үүнээс харахад тэд тушаал биелүүлж байгаа учир бид яах учраа ч олохгүй байна гэж цөхрөнгөө барсан янзтай байсан. Иргэд ч мөн тэдэн рүү дайрч “Та нар өнөөдөр дарга нарыгаа авч явж байна. Маргааш та бүхэн адилхан буруутан болно гэдгийг ойлгож байна уу. Хэдий цагдаагийн дарга нар ч гэсэн төрийнхнөөс л үүрэг авсан” гэж эсэргүүцэл үзүүлж байлаа. Тэд Ч.Хосбаяр шүүгчийг тайлбар хийхийг шаардаж, үүнийгээ ард түмэнд нээлттэй харуулах гэсэн. Энэ үеэр цагдаагийн “томчууд” бүгд очсон байв. Өчигдөр 19:00-21:00 цаг хүртэл тэнд байсан ч хурандаа нарыг хэзээ авч явах нь тодорхойгүй байсаар л байв. Мөн намайг алаад аваад яваарай гэж хашгиралдацгааж байв. Түүнчлэн Ч.Амарболд, Ш.Батсүх, О.Зоригт нарын биеийн байдал муу байгаа тул эмчлэгч эмч нар нь хүнд хүмүүсийг хорих руу явуулахгүй гэв. Харин цагдаагийн ар гэрийнхэн нь биднийг алж байж авч яваарай хэмээн цагдаа нар руу хашгирч байв.
Бүтэн дөрвөн жилийн турш бүгдийн анхааралд байсан долоодугаар сарын 1-ний гэх тодотголтой хэргийн шүүх хурал өнгөрсөн долоо хоногт болж, шүүхийн шийдвэрээс сүр дуулиантайхан хариу гарсан. Шүүхийн шийдвэр гаргахдаа Эрүүгийн байцаан шийтгэх хуульд заасан хэд хэдэн зүйл заалтыг зөрчжээ. Энэ нь шүүгдэгчид шүүх бүрэлдэхүүнээс татгалзчихаад байхад шүүгч эрх мэдлээ хэтрүүлэн тэдний хэргийг хоёр таслаад зогсохгүй Ч.Амарболд Ш.Батсүх, О.Зоригт нарт таслан сэргийлэх арга хэмжээ авсан явдал юм.
Ийм шийдвэр гаргасан нь тэднийг шүүх хурлын эцсийн хариу гартал шүүн таслах ажиллагаанд саад болж болзошгүй гэсэн шалтгааныг тогтоосон. Гэтэл хурандаа нар энэ талаар өөрсдөө тайлбарлахдаа “Бид өөрсдөө хууль шүүхийн байгууллагад 20-30 жил ажилласан хүмүүс. Ямар үед шүүн таслах ажиллагаанд яаж саад учруулдгийг мэднэ. Гэтэл бид ямар ч тийм үйлдэл гаргаагүй байхад үндэслэлгүйгээр ийм шийдвэр гаргалаа” гэж байсан.
Энэ асуудлыг хуулийн талаас нь авч үзвэл шүүгдэгчид, шүүгчээс татгалзсан тохиолдолд шүүгч ямар нэгэн шийдвэр гаргах эрхгүй байдаг байна. Гэтэл шүүх бүрэлдэхүүн уг зүйл заалтыг үл ойшоосон үйлдэл гаргасан. Хэргийн гол асуудал нь хамтдаа долоодугаар сарын гэх тодотголтой байсан хэргийн дөрвөн хүнийг юунд гурав, нэг болгож шүүх гэж байгаа нь цаанаа бас хардлага төрүүлж байгаа талаар ярих хүн ч олон.
Тухайлбал, долоодугаар сарын 1-ний үймээний үеэр дөрвөн хүн амиа алдсан хэрэгт холбогдуулан шалгасан цагдаагийн хурандаа нарын хэргийг хоёр салгаж, улмаар гурвыг нь цагдан хорих шийдвэр гаргасан явдал юм.
Хэргийг салгасан шалтгаан гэвэл тун товчхон. Шүүгдэгч Г.Ганбаатарын өмгөөлөгч Б.Оросоо нь 21 хоногийн хугацаанд БНСУ руу явсан учраас шүүх хуралд оролцох боломжгүй болсон явдал. Харин Г.Ганбаатарын зүгээс шүүх хурлыг саатуулахгүйн үүднээс нэмж өмгөөлөгч авч, шүүх хуралд оролцох хүсэлтээ гаргаж өгсөн боловч түүний хүсэлтийг шүүх бүрэлдэхүүн хүлээж аваагүй юм байна.
Ингэхдээ шүүх бүрэлдэхүүн хууль бус ажиллагаа явуулж, үндэслэлгүйгээр өнгөрсөн хугацаанд хамт шалгагдаж байсан хэргийг салгаж байна гэдгийг шүүгдэгчдийн өмгөөлөгчид удаа дараа хэлж байсан. Тэр ч бүү хэл тус шүүх хуралд улсын яллагчаар оролцсон Нийслэлийн прокурорын газрын хяналтын прокурор С.Хишигжаргал шүүх бүрэлдэхүүнд хандаж “Ингэж болохгүй. Энэ хүмүүсийн хэргийг хамтад нь шалгах ёстой” хэмээн хэлж байхад Г.Ганбаатар хурандаагийн хэргийг тусад нь авч хэлэлцэхээр болсон нь шүүхийг хардахад хүргэж байгаа юм.
Үүнийг улстөрийн захиалгат хэрэг гэж ч ойлгож болохоор юм. Ингээд шүүх хуралдаан эхлэхэд дахин эл байдлыг тайлбарласан боловч хүлээж авах боломжгүй хэмээгээд дөрвөн жил хамтад нь шалгасан хэргийг салгаж, шуугиан дэгдээгээд байна.
Түүнчлэн шүүх хуралд оролцож чадахгүй гэдгээ урьдчилан мэдэгдсэн Б.Оросоо өмгөөлөгчийг 513 мянган төгрөгөөр торгох шийдвэрийг гаргасан явдал. билээ. Аль эсвэл шүүх Г.Ганбаатар хурандааг өөрсдийн ивээлдээ багтаах гэсэн нууц санаа юм болов уу.
Хамгийн гол нь адил хэмжээнд шүүгдэх учиртай дөрвөн хүнээс нэгийг нь авч үлдсэнийг юу гэж тайлбарлах вэ. Шүүгч Ч.Хосбаяр Г.Ганбаатарыг юуны учир авч үлдэв. Долоодугаар сарын 1-ний хэргээр гул барьж, улстөр хийгчдэд, шүүгчдэд энэ ямар ашигтай вэ гэх олон асуулт шинээр гарч, хариултаа хүлээх боллоо.
Энд тохирох хамгийн энгийн хариултыг улстөрөөс, тэр дундаа төрийн тэргүүнээсээ хайж болох юм. Шүүх засаглал, прокурор, Авлигатай тэмцэх газар, Үндэсний аюулгүй байдлын зөвлөлийг гартаа атгасан тэрбээр шүүгч Ч.Хосбаяртай нэг нутгийнх. Дээрээс нь бараг л ах дүүс шиг харилцаатай тэднийг энэ удаагийн шүүх хурлыг хүссэнээрээ дэглэсэн гэж учир мэдэх хүмүүс ярьж байна.
2008 оны долоодугаар сарын 1-ний шөнө төрийн өндөрлөгүүд намуудын дарга нартай уулзах үеэр одоогийн Ерөнхийлөгч маань “Буудсан сумны чинь хонгио одоо ч миний халаасанд байна” гэсэн. Тэгэхээр эрхэм Ерөнхийлөгч өөрөө тэр үед болсон явдлын амьд бөгөөд хамгийн жинтэй гэрч байх юм.
Өглөөний сонин
0 сэтгэгдэл:
Post a Comment