2014/11/28

МАН УЗ-ийн хурлаа зарлалаа

МАН Удирдах зөвлөлийн хуралдаанаа зарласан байна. Гэнэт зарлагдсан энэхүү хурлаар 14.00 цагт хуралдах Бага хурлаар хэлэлцүүлэх асуудлыг ярилцах аж. Мөн яг одоо УИХ дахь МАН-ын бүлэг хуралдаж буй. Дээрх хуралдаантай холбоотойгоор өнөөдөр 14.00 цагт зарлагдсан МАН-ын Бага хурал цагийн хувьд бага зэрэг хойшилж болзошгүй юм байна.

Г.ДАРЬ

 

МАН-ын бүлэг 14 цагт хуралдана

УИХ дахь МАН-ын бүлэг 14 цагт хурал зарлажээ. Тус цагт Тусгаар тогтнолын ордноо МАН-ын Бага хурал мөн эхлэх товтой юм. Иймд тус бүлгийнхний хувьд түргэвчилсэн байдлаар асуудлаа хэлэлцээд Бага хурал руугаа хөдөлцгөөх бололтой. Ерөнхий сайд Ч.Сайханбилэгийн парламентад суудал бүхий намуудад хүргүүлсэн хамтран засаг байгуулах саналд МАН-ын бүлгийн дийлэнх гишүүд "хамтран засгаа байгуулах нь зүйтэй, намын эрх ашгаа улс орны эрх ашгаас хойно тавих ёстой" хэмээн үзэж буй юм. 

Б.ЭНХ

 

2014/11/27

МАН Бага хурлаа хойшлууллаа

МАН өнөөдөр 14.00 цагт Бага хурлаа хийхээр товлоод байсан ч тодорхойгүй хугацаагаар хойшлуулжээ. Бага хурлыг хойшлуулах шийдвэрийг тус намын Удирдах зөвлөл хуралдан гаргасан байна. Энэ талаар МАН-ын ерөнхий нарийн бичгийн дарга Ж.Мөнхбат дөнгөж сая сэтгүүлчдэд мэдээлэл хийх үеэрээ хэллээ. Мөн тэрээр МАН-ын Удирдах зөвлөл нь Бага хурлыг товлох, хурлыг цуцлах, хойшлуулах эрхтэй гэсэн юм.

Бага хурлыг хойшлуулах болсон шалтгааныг Засгийн газрыг хамтран байгуулах хүрээнд УИХ дахь МАН-ын бүлэг, УИХ дахь Ардчилсан намын бүлгээс байгуулагдсан ажлын хэсгийн зөвшилцлийн үр дүн нь Бага хурлыг зарлан хуралдуулах хэмжээнд хүрээгүй гэж үзсэн байна.

Энэ үеэр сэтгүүлч "Зөвшилцлөөр яг юу яриад байна вэ. МАН Засгийн газарт хамтарвал сайдын зургаан суудал авч, Ардчилсан нам сайдын долоон суудал авна гэдэг тохироондоо хүрч чадахгүй байгаа юм уу. Яг, юунаас болж хамтрах эсэх асуудлыг шийдэж чадахгүй байгаад хариулт өгнө үү" гэсэн юм.

Дээрх асуултад МАН-ын ерөнхий нарийн бичгийн дарга Ж.Мөнхбат "Сайдын сандал ширээний асуудлыг талууд яриагүй. Эдийн засгийн хямралыг яаж даван туулах юм. Оюутолгой, Тавантолгойн гэрээний нөхцлийг өмнөхөөс нь дордуулахгүй байх ямар гарц хайж байна вэ гэдэг асуудлаар зөвшилцөл хийсэн. Намын бүлгүүдээс байгуулагдсан ажлын хэсэг дөрвөн ч удаагийн уулзалт хийсэн. МАН асуудлыг яаралтай шийдэхийн төлөө байгаа. Ерөнхий сайд Ч.Сайханбилэг Засгийн газарт хамтрах саналыг өнгөрсөн даваа гаригт УИХ дахь МАН-ын бүлэгт ирүүлсэн. Эл саналыг бүлэг авсан өдөртөө багтааж УИХ-ын гишүүн Су.Батболдоор ахлуулсан ажлын хэсгийг байгуулсан. Төрийн ажлыг гацаах, хойшлуулах зүйл хийгээгүй" гэж хариуллаа.

Г.ДАРЬ

 

УЗ-ийн хурал эхлээгүй байна

МАН Бага хурлаа 14.00 цагт хийхтэй холбоотойгоор Удирдах зөвлөлийн хурлаа зарласан ч хараахан эхлээгүй байна.

Мөн УИХ дахь МАН-ын бүлэг нь чуулганы нэгдсэн хуралдааны дундуур хуралдсан бөгөөд одоо хэвлэлийнхэнд мэдээлэл хийх болжээ.

Г.ДАРЬ

Хүн амын хөгжлийн бодлогыг тунхагийн чанартай гэв

УИХ-ын чуулганы нэгдсэн хуралдаанаар Монгол Улсын төрөөс хүн амын хөгжлийн талаар баримтлах цогц бодлого батлах тухай УИХ-ын тогтоолын төслийг хэлэлцээд олонхи гишүүн дэмжсэнээр "Төслийг хэлэлцэх нь зүйтэй" хэмээн үзлээ.

Хүн амын зүйн ачаалал 2011 оноос хойш тогтвортой өсч, 15-59 насныхан дийлэнх хувийг эзлэх болжээ. Энэ нь хөдөлмөрийн насныхан бусад насныхнаас хамгийн өндөр хувьтай байгааг харуулж буй аж. Улс орнууд энэхүү хүн амын цонхны үеийг ашиглаж, эдийн засгийн өсөлтөө хангадаг. Тиймээс Монгол Улс хөдөлмөрийн насныхныг ажлын байраар хангахаас эхлээд хөгжил, хамгааллын асуудлыг бодлогын төвшинд нь шинэчилж, илүү холыг харах. Мөн хүн амын цонхны үе дуусч, тэтгэвэрт гарахад ямар байдал үүсэх вэ түүнийг хэрхэн зохицуулах вэ гэдгийг хууль эрх зүйн хүрээнд зарим зохицуулалтыг хийх шаардлага тулгарсан байна. Тиймээс Засгийн газар дээрх тогтоолын төслийг боловсруулжээ.

Хэлэлцүүлгийн шатанд УИХ-ын гишүүн С.Бямбацогт "Монгол Улсыг монгол хүн л хөгжүүлнэ. Хүнээ хөгжүүлэх асуудлыг цогцоор нь бодлогод суулгаж өгөх ёстой. Дээр нь бүсчилсэн хөгжлийн асуудал ч мөн хамаарна" гэж онцолсон бол УИХ-ын гишүүн Р.Амаржаргал хүн амын хөгжлийн талаар баримтлах цогц бодлого нь тунхагийн чанартай болсон учраас дэмжих боломжгүй гэж байр сууриа илэрхийлэв.

Мөн УИХ-ын гишүүн Ц.Даваасүрэн "Нэгдүгээр ангид зургаан настнууд элсэн суралцдаг болсноор хөдөөгийн гэр бүлүүд хоёр тусдаа амьдрах болж, энэ нь эргээд гэр бүл салалтад нөлөөлөх болсон. Хөдөөд ажлын байр байхгүйгээс хот руу ирж төвлөрдөг. Ядуу тарчиг амьдралын тухай яриад байх авч энэ мэт асуудлыг олж харж, шийдлийг гаргаагүй цагт УИХ-аас хэчнээн ч бодлого баталлаа ч хүндээ хүрэхгүй" гэсэн юм.

Ийн асуудлыг талууд нэлээд ярилцсаны эцэст санал хураахад тогтоолын төсөл дэмжлэг хүлээж, анхны хэлэлцүүлэгт бэлтгүүлэхээр УИХ-ын Нийгмийн бодлого, боловсрол, соёл, шинжлэх ухааны байнгын хороонд шилжүүллээ.

Г.ДАРЬ

 

Д.Ганхуяг “Шонхор” фракцийг тэргүүлнэ

УИХ-ын дарга З.Энхболд  намын даргынхаа тамгыг гардсаны дараа "Шонхор" фракциас гарч байгаагаа албан ёсоор мэдэгдэн, фракцийнхныгаа хүлээн авч энэ талаараа хэлсэн билээ.

Тэгвэл түүний оронд "Шонхор"-ыг хэн толгойлох вэ гэдэг яриа АН-ын дунд өрнөөд байсан. Эх сурвалжаас авсан мэдээгээр УИХ-ын гишүүн,  Уул уурхайн сайд асан Д.Ганхуяг "Шонхор"-ыг толгойлохоор болсон байна. Тус фракцид УИХ-аас С.Одонтуяа, Д.Ганбат, Ж.Батзандан, Г.Баярсайхан, С.Эрдэнэ нар харьяалагддаг юм. "Шонхор"-ынхоны  урвалтаас болж Н.Алтанхуягийн Засгийн газар огцорсон гэх хардлага хамгийн сүүлд энэ бүлэглэлийг дайраад байгаа билээ.

 О.САР

Б.Хурцыг АТГ-ын дэд даргаас чөлөөллөө

УИХ-ын чуулганы нэгдсэн хуралдаанаар Авлигатай тэмцэх газрын дэд дарга Б.Хурцыг үүрэгт ажлаас нь чөлөөлөх тухай хүсэлтийг хэлэлцээд гишүүдийн 93.3 хувь дэмжиж, тогтоолыг баталлаа. Ингэснээр Авлигатай тэмцэх газрын дэд дарга Б.Хурц чөлөөлөгдөж, Засгийн газрын хуралдаанаас гаргасан шийдвэрийн дагуу тэрээр Тагнуулын ерөнхий газрыг удирдах боллоо.

Эл асуудлыг хэлэлцэн шийдвэрлэснээр УИХ-ын чуулганы үдээс хойшхи хуралдааныг өндөрлүүлээд байна.

Г.ДАРЬ

 

МАН-ын бүлэг дахин хуралдахаар болов

УИХ дахь МАН-ын бүлгийн хурал өндөрлөв. Уг хуралдаанаар Ерөнхий сайд Ч.Сайханбилэгийн хүргүүлсэн хамтран Засгийн газар байгуулах саналтай холбоотойгоор байгуулсан Ажлын хэсгийнхээ мэдээллийг сонсч, зарим чиглэл, даалгавар өгсөн байна.

Бүлгийн хувьд маргааш үдээс хойш хуралдах МАН-ын Бага чуулганы өмнө дахин хуралдах нь зүйтэй гэж үзсэн бөгөөд саяын хурлаар тодорхой шийдэл гаргаагүй тухай эх сурвалж хэллээ. 

Өнөөдөр үдээс хойш хуралдсан бүлгийн хуралдааны үеэр МАН-ын гишүүдийн дунд Ерөнхий сайд Ч.Сайханбилэгийн сүүлд хийсэн томилгоотой холбоотой шүүмж гарсан гэх мэдээлэл байна. "Хамтарч засаг байгуулъя гэсэн хэрнээ асуудлыг нэг тийш шийдээгүй байхад агентлагийн дарга нарын томилгоогоо хийлээ" хэмээн МАН-ын зарим нэг гишүүн дургүйцлээ илэрхийлсэн бололтой.

Б.ЭНХ

 

“Хариуцлагыг чангатгах хэрэгтэй”

УИХ-ын чуулганы хуралдаанаар Хүүхэд харах үйлчилгээний тухай хуулийн төслийг хэлэлцэж байна.

Гишүүд үндсэндээ байгаа нөхцөл байдалтайгаа уялдаж хэлэлцэх нь зүйтэй гэх байр сууриа илэрхийлж буй бөгөөд хяналт хариуцлагыг чангатгаж, тодорхой болгох нь зүйтэй хэмээж байна.

Тухайлбал, гишүүн Ж.Батзандан "Найруулгын шинжтэй байж болох санал хэлье. Хүүхэд харах үйлчилгээнд тавигдах нийтлэг шаардлагад галын аюулгүй байдлын стандарт хангасан гэдгийг тодорхой болгох. Хүүхдэд нойрсуулах болон тайвшруулах эм бэлдмэл өгөхийг хориглоно гэдгийг эмчийн зөвшөөрөлгүйгээр гэж тодотгомоор байна. Хууль батлагдсаны дараагаар борооны дараах мөөг шиг олноор хүүхэд харах үйлчилгээний газрууд бий болно. Иймд эхлээд туршилтын хугацаа баймаар байна. Хариуцлагын заалтыг тодотгож захиргааны хариуцлага хүлээлгэхээргүй бол эрүүгийн хариуцлага хүлээхээр заах хэрэгтэй" гэсэн бол гишүүн О.Хүрэлбаатар "Би гэртээ 10 хүүхэд гарлаа гээд дутуу хүүхэд харах, мөнгө завших явдал гарвал яах вэ. Энэ мэтээр мөнгө завших сэдлүүд үүсэх боломж бий. Яаж хяналт нь тавих нь эргэлзээтэй байна. Угтаа бол боловсролын тогтолцоог иж бүрнээр нь авч үзэх хэрэгэтй. Цэцэрлэг яслийн нэгдсэн тогтолцоог өргөжүүлэх ёстой байтал албан бус хэлбэрийг дэмжих нь зүйтэй юу. Хувийн цэцэрлэг, яслийг дэмжих бодлого илүү хэрэгтэй. Олон хүүхэд цэцэрлэгт хамрагдах нөхцөл шаардлага бий гэдгийг хүлээж байна. Гол нь хариуцлагыг тодотгох хэрэгтэй" гэсэн юм.

Чуулганы хуралдаан үргэлжилж байна. 

Б.ЭНХ

 

Д.Ганхуяг БНАСАУ-ын төлөөлөгчдийг хүлээн авч уулзав

"Цэнхэр сүлд" төрийн бус байгууллага Зэвсэгт мөргөлдөөнөөс урьдчилан сэргийлэхийн төлөөх дэлхийн түншлэл /Global Partnership for the Prevention of Armed Conflict - GPPAC / байгууллагатай хамтран "Зүүн хойд Азийг цөмийн аюулаас ангижруулах нь" сэдэвт олон улсын бага хурлыг Гадаад харилцаа, эдийн засгийн хамтын ажиллагааны яамны ивээл дор 2014 оны 11 дүгээр сарын 26-27-нд Улаанбаатар хотноо зохион байгуулсан билээ. 

Энэхүү бага хуралд оролцож буй Бүгд Найрамдах Ардчилсан Солонгос Ард Улсын Хөдөлмөрийн намын Төв Хорооны харьяа Үндэсний энх тайвны хорооны Ерөнхий нарийн бичгийн дарга О Рен Ил-ийг ГХЭЗХА-ны дэд сайд Д.Ганхуяг 11 дүгээр сарын 27-ны өдөр хүлээн авч уулзлаа.

Энэ үеэр хоёр орны уламжлалт найрсаг харилцаа, хамтын ажиллагааг бэхжүүлэх, дээд, өндөр түвшний харилцан айлчлалыг тогтмолжуулах, Солонгосын хойг болон бүс нутгийн хэмжээнд хамтын ажиллагаагаа өргөжүүлэх талаар санал солилцов.

Дэд сайд Д.Ганхуяг ЗХА-ийн аюулгүй байдлын асуудлаарх "Улаанбаатарын яриа хэлэлцээ"-ний хүрээнд зохион байгуулагдаж буй арга хэмжээнүүдэд БНАСАУ-ын тал бүхий л түвшинд идэвхтэй оролцож байгаад баяртай байгаагаа илэрхийлж, Монгол Улс цаашид ч бүс нутгийн улс орнуудын хооронд харилцан итгэлцлийг бий болгох, тулгарч буй аливаа асуудлыг яриа хэлэлцээний замаар шийдвэрлэхийн төлөө ажиллахаа тэмдэглэв.

Солонгосын тал СХН-ын Төв Хорооны харьяа Үндэсний энх тайвны хорооны үйл ажиллагааны талаар дэлгэрэнгүй танилцуулж, ЗХА, Солонгосын хойгийн энх тайван, аюулгүй байдлыг хангахын төлөө "Цэнхэр сүлд" ТББ болон бусад олон улсын байгууллагуудтай хамтран ажиллах эрмэлзэлтэй байгаагаа илэрхийлж байв.     

GPPAC-ийн шугамаар зохион байгуулагдаж буй энэхүү бага хуралд Улаанбаатар, Токио, Киото, Пхеньян, Сөүл, Владивосток, Бээжин, Хонконг болон Тайпэй зэрэг хотын төлөөлөгчид оролцож, байр сууриа илэрхийлэв.

Эх сурвалж: mfa.gov.mn

Хүүхэд харах үйлчилгээний хуулийг хэлэлцэхийг дэмжив

Улсын Их Хурлын чуулганы өнөөдрийн /2014-11-27/ үдээс хойшх нэгдсэн хуралдаанаар Хүүхэд харах үйлчилгээний тухай болон түүнд холбогдох бусад хуулийн төслийг хэлэлцэх эсэхийг асуулт, хариултаар үргэлжлүүлэв.

Улсын Их Хурлын гишүүд дээрх хуулийн төсөл санаачлагч болон ажлын хэсгийнхэнд хандаж тавьсан асуултдаа, дээрх хуулийн төслийн үзэл баримтлал нь шат шатны боловсролын нэгдсэн бодлого, тогтолцоо, стандартад нийцэж байгаа эсэх, хүүхэд харах үйлчилгээний хувьсах зардал, санхүүжилт ямар байх, үйлчилгээ явуулах тусгай зөвшөөрлийг хэрхэн олгох, үйлчилгээнд нь хяналт тавих, эцэг, эхийн зөвлөлтэй байх эсэх, хүүхдийг хөгжүүлэх, тэдэнд мэдлэг, боловсрол олгох асуудал төсөлд хэрхэн тусгагдсан зэрэгт анхаарал хандуулж хариулт авав.

Улсын Их Хурлын зарим гишүүд саналаа илэрхийлэхдээ, хуулийн төсөлд хариуцлага, хяналтын тогтолцоо хангалтгүй, төвийн эрх үүрэг нь тодорхой бус байгаад шүүмжлэлтэй хандахын зэрэгцээ боловсролын тогтолцоог иж бүрнээр нь авч үзэх, энэ хүрээнд өмнөх тогтолцоог улам бэхжүүлэх буюу уялдуулахад анхаарах, эцэг эхийн хариуцлага, оролцоог нэмэгдүүлэх талаар ярив.

Энэ хуулийн төслийг хэлэлцэж баталснаар, өрсөлдөөн бий болж улмаар хүүхэд харах төвийн үйлчилгээ нь илүү чанартай, стандартад илүү нийцсэн байх болно гэж үзэж байгаагаа тэд илэрхийллээ.

Улсын Их Хурлын гишүүдийн олонх энэ хуулийн төсөл болон түүнд холбогдох бусад хуулийн төслийг хэлэлцэх нь зүйтэй гэж үзэж улмаар анхны хэлэлцүүлэгт бэлтгүүлэхээр холбогдох Байнгын хороонд шилжүүлэв.

Дараа нь Батын Хурцыг Авлигатай тэмцэх газрын дэд даргын үүрэгт ажлаас нь чөлөөлөх тухай асуудлыг хэлэлцэж дэмжсэнээр Улсын Их Хурлын чуулганы өнөөдрийн нэгдсэн хуралдаан ажлаа өндөрлөв гэж УИХ-ын Тамгын газрын Хэвлэл, мэдээлэл, олон нийттэй харилцах хэлтсээс мэдээлэв.

2014/11/26

Ерөнхий сайд томилгоо хийлээ

Засгийн газрын ээлжит хуралдаан дөнгөж сая өндөрлөв. Энэ хуралдаанаар Ерөнхий сайд Ч.Сайханбилэг зарим агентлагийн дарга нарыг өөрчилж томилжээ.

Үүнд:

Шүүхийн шийдвэр гүйцэтгэх ерөнхий газрын дарга С.Буяндалайг чөлөөлж, Б.Билэгтийг,

Тагнуулын ерөнхий газрын дарга Б.Ариунсанг чөлөөлж Б.Хурцыг,

Цагдаагийн Ерөнхий газрын дарга С.Баатаржавыг чөлөөлж, Р.Чингисийг,

Татварын Ерөнхий газрын дарга Т.Батмагнайг чөлөөлж Б.Ариунсанг тус тус томиллоо.

Т.АНУ

Ерөнхий сайд хууль зөрчсөн үү?

Засгийн газрын хуралдаанаас өчигдөр Авлигатай тэмцэх газрын дэд даргын алба хашиж байсан Б.Хурцыг Тагнуулын ерөнхий газрын даргаар томилсон нь Монгол Улсын Үндсэн хууль зөрчсөн үйлдэл болж, улстөрчдөд бас нэгэн ажил нэмэгдлээ.

Хуульд зааснаар Авлигатай тэмцэх газрын дарга, дэд даргыг томилох, чөлөөлөх бол УИХ-аар асуудлыг оруулж, хэлэлцүүлэн батлуулдаг юм байна. Нэг үгээр хэлбэл, УИХ-аас Б.Хурцыг Авлигатай тэмцэх газрын дэд даргаас нь чөлөөлөөгүй байхад Тагнуулын ерөнхий газрын даргаар томилсон нь асуудал үүсгэж эхэллээ.

Зарим цахим хэвлэлд энэ асуудлыг хуульчид Үндсэн хуулийн цэцэд өгөхөөр бэлтгэж байгаа тухай мэдээлж буй. Гэхдээ Засгийн газрын өчигдрийн хуралдаанаас гаргасан шийдвэрийн талаар өнөөдөр 11.30 цагт холбогдох албаны хүмүүс хэвлэлийнхэнд мэдээлэл хийхээр болоод байна.

Мөн УИХ-ын даргын тодотгосноор өнөөдөр УИХ-ын Хууль зүйн байнгын хороог хуралдуулж, Авлигатай тэмцэх газрын дэд дарга Б.Хурцыг албан тушаалаас нь чөлөөлөх асуудлыг хэлэлцэн шийдвэрлэж, УИХ-д оруулж ирэх юм байна. Улмаар энэ асуудлыг УИХ хэлэлцэн, шийдвэрлэх чиг барьж буй аж.


Сануулахад, Засгийн газрын өчигдрийн ээлжит хуралдаанаар Ерөнхий сайд Ч.Сайханбилэг зарим агентлагийн дарга нарыг өөрчилж,

Шүүхийн шийдвэр гүйцэтгэх ерөнхий газрын дарга С.Буяндалайг чөлөөлж, Б.Билэгтийг,

Тагнуулын ерөнхий газрын дарга Б.Ариунсанг чөлөөлж Б.Хурцыг,

Цагдаагийн Ерөнхий газрын дарга С.Баатаржавыг чөлөөлж, Р.Чингисийг,

Татварын Ерөнхий газрын дарга Т.Батмагнайг чөлөөлж Б.Ариунсанг тус тус томилсон билээ.

 

Г.ДАРЬ

 

Женев муж улсын Төрийн зөвлөлийн Ерөнхийлөгчтэй уулзав

Монгол Улсаас Женев дэх НҮБ-ын төв болон олон улсын бусад байгууллагын дэргэд суугаа Байнгын төлөөлөгч, Швейцарийн Холбооны Улсад суугаа Онц бөгөөд Бүрэн эрхт Элчин сайд В.Пүрэвдорж 2014 оны 11 дүгээр сарын 25-ны өдөр Швейцарийн Холбооны Улсын Женев муж улсын /кантон/ Төрийн зөвлөлийн Ерөнхийлөгч ноён Франсуа Лоншомп-той уулзав.

Уулзалтын үеэр Элчин сайд В.Пүрэвдорж Швейцарийн Женев муж улстай худалдаа, эдийн засаг, соёлын харилцааг хөгжүүлэх сонирхолтой байгаагаа илэрхийлээд, ирэх оны дундуур Улаанбаатар хотноо зохион байгуулахаар төлөвлөж байгаа Монгол, Швейцарийн бизнес форумд Женевийн бизнесийн төлөөллийг оролцуулах, мөн муж улсын хэмжээнд Монголын урлаг, соёлыг сурталчлах чиглэлээр хамтран ажиллах зэрэг саналуудыг дэвшүүлэв. Түүнчлэн энэ онд Улаанбаатар хотын Иргэдийн төлөөлөгчдийн хурлын болон Монгол Улсын Сонгуулийн ерөнхий хорооны төлөөлөгчид Женев кантонд айлчилж хотын тохижилт үйлчилгээний төлөвлөлт бодлого, мөн олон нийтийн санал асуулгыг зохион байгуулж буй арга туршлагатай тус тус танилцсаныг мэдээллээд, манай тал Женев кантоны захиргаа төрийн үйлчилгээг иргэддээ шуурхай, чанартай хүргэж буй арга туршлагаас нь суралцах, судлах сонирхолтой байгааг дурдав. Тэрээр мөн ноён Франсуа Лоншомп-ыг тааламжтай цагтаа Монгол Улсад айлчлахыг урьсан болно.

Женев кантоны Төрийн зөвлөлийн ерөнхийлөгч ноён Франсуа Лоншомп Монгол Улсын эдийн засгийн хөгжил, уул уурхай, зам тээвэр, аялал жуулчлалын салбарыг хөгжүүлэх бодлого, авч хэрэгжүүлж буй алхмуудын талаар сонирхож, соёл урлаг, эдийн засгийн чиглэлээр хамтын ажиллагааг хөгжүүлэх тухай Элчин сайдын дэвшүүлсэн саналуудыг дэмжиж буйгаа илэрхийлэв.

Женев кантон нь Швейцарийн Холбооны Улсыг бүрдүүлж буй 26 кантон буюу муж улсын нэг бөгөөд кантоны төв болох Женев хотноо НҮБ болон олон улсын 30 гаруй байгууллагууд байрладаг. Түүнчлэн Женев нь олон улсын банк санхүүгийн томоохон төв төдийгүй биотехнологи, эмийн үйлдвэрлэл, цаг, үнэртэн гоо сайхан болон дэлхийд тэргүүлэх бусад брэнд бүтээгдэхүүний компаниуд төвлөрсөн бизнес, үйлдвэрлэлийн чухал төв билээ.  

Эх сурвалж: mfa.gov.mn

Сүхбаатар дүүргийн МАН-ын хороо баяраа тэмдэглэлээ

Сүхбаатар дүүргийн МАН-ын хороо 

Тусгаар тогтнолын баяраа тэмдэглэлээ


Өнөөдөр туурга тусгаар Монгол Улсын анхдугаар Үндсэн хууль батлагдсаны түүхт 90 жилийн ойн өдөр. Сүхбаатар дүүргийн Монгол Ардын намын хорооноос уг тэмдэглэлт өдрийг тохиолдуулан "Тусгаар тогтнолын үнэ цэн" сэдэвт уулзалт хэлэлцүүлгийг зохион  байгууллаа.

Уулзалтад Сүхбаатар дүүргийн МАН-ын хорооны ахмад дунд залуу үеийн төлөөлөл болох 80  гаруй намын гишүүд  оролцлоо. Түүнчлэн Монгол Улсын хилийн зурвасыг байгуулалцаж явсан 70-р үүрийн гишүүн бэлтгэл хурандаа Гончигийн Хүүжий гуай оролцож, түүхэн үйл явдлын дурсамжаа ярьлаа.Тэрээр он цагийн урсгалд баларч гээгдэхийн аргагүй үйл явдал бол 1924 оны арваннэгдүгээр сарын 26 юм гээд сүүлийн хоёр, гурван жил эл өдрийн үнэ цэнэ, ач холбогдлыг үгүйсгэх, бүрхэгдүүлэх санаа бодол энэ засгийн үед биежиж, бүр зорилгодоо хүрч байгаад эмзэглэж явдгаа илэрхийллээ.


 Хууль зүйн ухааны доктор Болбаатарын Гүнбилэг тус арга хэмжээний нэгэн хүндтэй зочин байсан бөгөөд "Тусгаар тогтнол" сэдвээр илтгэл тавьж, "Монгол Улсад тусгаар тогтнолоос илүү үнэтэй эрхэм зүйл үгүй" хэмээн онцолж, оролцогчдын асуултад хариулт өглөө.Хойч үеийн төлөөлөл болсон Батжаргалын Баттүвшин "Тусгаар тогтнол чамайг тунхаглан бичнэ би", Билгүүнсайханы Мөнхтулга "Би Монгол хүн" шүлгийг уншиж сонирхууллаа.


Тус арга хэмжээний үеэр МАН-ын үйл ажиллагааг дэмжигч 6 залуу намд элсэх өргөдлөө өгч, батлахаа гардан авлаа.  Уулзалтад оролцогчид тус үйл ажиллагааг зохион байгуулж байгаад талархалтай байгаагаа илэрхийлж, эрх баригчдын харалган бодлогын балгаар тэмдэглэлт өдрөөс хассан ч ард олны зүрх сэтгэлд энэхүү өдөр онцгой тэмдэглэлт баяр хэвээрээ үлдсэн гэцгээж байлаа.