Н.Мөнх-Оргил гурав дахь удаагаа ялын дээд хэмжээ сонслоо

Өнгөрсөн 2008 онд хөвсгөл аймагт найман настай охиныг хүчирхийлэн, онц хэрцгийгээр амийг нь хөнөөсөн хэрэгт..........
...... буруутгагдан, анхан болон давж заалдах шатны шүүхээс хоёр удаа цаазын ял сонссон Н.Мөнх-Оргилын гомдлыг өчигдөр Дээд шүүхэд хэлэлцэн анхан шатнаас оноосон ялыг хэвээр баталлаа.
Ингэснээр тэрбээр гурав дахь удаагаа цаазын ял сонсч байгаа юм. Тэрбээр хоёр шатны шүүхийн шийдвэрийг эсэргүүцэн, өнгөрсөн нэгдүгээр сард Улсын Дээд шүүхэд гомдол гаргасан ч түүнд оноосон цаазын ялыг хэвээр баталсан юм.

Өчигдрийн шүүх хуралд Дээд шүүхийн таван шүүгч, Н.Мөнх-Оргилын өмгөөлөгчөөр Б.Халзан, Э.Ганбат нар оролцов. Шүүх бүрэлдэх үүн хэргийг хянан хэлэлцээд, өмнөх шатны шүүхүүд Эрүүгийн хуулийн зүйл, заалтыг зөв хэрэглэсэн гэсэн шийдвэрийг гаргасан байна.
Одоо энэ хэргийг Дээд шүүхийн бүгд хуралдаанаар хэлэлцэх бөгөөд тус хуралдаанаас дээрх ялыг хэвээр батлах юм бол Монгол Улсын Ерөнхийлөгчөөс амь гуйх зам үлдсэн гэдгийг шүүгдэгчийн өмгөөлөгчид хэллээ.Н.Мөнх-Оргилыг Эрүүгийн хуулийн 125.2 буюу бэлгийн дур хүслээ ёс бусаар хангасан, энэ хэргийг давтан үйлдсэн, 126.3 буюу насанд хүрээгүй хүүхдийг хүчирхийлсэн 91.2.6 91.2.10, 91.2.15-д зааснаар буюу гэмт хэргээ нуун далдлах зорилгоор, санаатайгаар, хохирогчийг биеэ хамгаалах чадваргүйг мэдсээр байж амь насыг нь хөнөөсөн гэсэн үндэслэлээр буруутган яллаж буй.
Мөн найман настай охиныг хүчирхийлж, амийг нь егүүтгэснээс гадна Баянгол дүүргийн нутаг дэвсгэрт бага насны гурван охин хүчирхийлсэн гэм буруутай хэмээн үзэж байгаа юм.

М.ӨЛЗИЙ