Долоо хоног бүрийн даваа гаригт болдог Сайдын цаг-аар энэ удаа Аж үйлдвэрийн сайд Д.Эрдэнэбат оролцож тус салбарт хийгдэж буй ажилт, цаашдын төлөвлөгөө, аж үйлдвэрийн салбарын өнөөгийн нөхцөл байдлын талаар мэдээлэл өглөө. Шинэ Засгийн газрын шинэ яамыг удирдаж буй Аж үйлдвэрийн сайд Монгол Улс өнөөдрийг хүртэл импорт давамгайлсан, гаднаас хараат хавээр байгааг онцолсон. Тухайлбал хүнсний хэрэглээнийхээ 7.3 хувь буюу 383 сая ам.долларыг гадаадаас авч хэрэглэж байгаа аж. Сайдын мэдээлснээр 1.7 сая ам.долларын сүү, сүүн бүтээгдэхүүн, хуурай сүүг 19 сая ам.доллараар худалдан авч байгаа аж. Харин нийт экспорт 5.7 тэрбум ам.доллар байгаагийн 81.8 хувь нь буюу 4.7 тэрбум ам.доллар нь уул уурхайгаас түүхийгээр гаргаж буй бүтээгдэхүүн эзэлж байна. Өөрөөр хэлбэл экспортын ихэнх хувийг уул уурхайн бүтээгдэхүүн эзэлж, Монголчууд ердөө 50 сая ам.долларын бүтээгдэхүүн гадагшаа гаргаж байгаа аж. Харин аж үйлдвэрийн бараа бүтээгдэхүүний экспорт 0 хувьтай байгааг салбарын сайд онцлоод "Ийм нөхцөлд валютын ханшийн савлагаа алга болох, ард иргэдийн амжиргаа дээшлэх баталгаа алга" гэсэн юм. Үүний нэг томоохон шалтгаан нь үйлдвэржилтийн тогтворгүй бодлого гэж үзэж буйгаа дуулгалаа. Түүнчлэн Монголчууд өөрсдөө үйлдвэрлэж чаддаг өргөн хэрэглээний хүнсний бүтээгдэхүүнээ ч гаднаас авсан хэвээр байна. Тухайлбал ургамлын тосыг 25 сая ам. доллараар, элсэн чихэр 24 сая доллараар, цагаан будаа 14 сая, гурил 7 сая доллараар, жимс 6 сая доллараар, хүсний ногоог 10 сая долларт худалдан авч байгаа нь 110 сая ам.долларыг хүнсний бүтээгдэхүүний импортод зарцуулж байгаа аж. Аж үйлдвэрийн сайд Д.Эрдэнэбат "Энэ бол Монгол Улсыг мөнхийн гаднаас хараат байлгаж байгаа бодит тоо. Энэ тоон дээр үндэслэж цаашдын эдийн засгийн бодлогоо авч явахаас биш улстөржөөд, энэ тоо сайжрахгүй. Эдийн засагт улстөр байхгүй, эдийн засагт үнэн тоо л бий" гэсэн юм.
Аж үйлдвэрийн салбар хүнд, хөнгөн, боловсруулах, жижиг дунд үйлдвэр, чөлөөт бүс буюу аж үйлдвэрийн парк, худалдаа, экспорт, импорт, концессын асуудал хамаарч байна. Энэ хүрээнд Аж үйлдвэрийн яам байгуулагдснаас хойшхи 100 хоногт суурь бодлогын баримт бичгээ боловсруулжээ. Түүнчлэн УИХ-аар Чөлөөт бүсийн хууль батлагдаж, хөрш хоёр улстай гэрээ хэлэлцээр эхлэхэд бэлэн болсныг мэдээллээ.Хууль эрхзүйн шинэчлэлийн хүрээнд Худалдааны тухай хуулийг өргөн барихаар зэхэж байгаа бол Жижиг дунд үйлдвэрлэлийн тухай хуулийг бодлогын хувьд нэлээд өөрчилж оруулж ирэхээр болсон байна.
Нефтийн үйлдвэр барина
Аж үйлдвэрийн сайдын мэдээлснээр энэ долоо хоногийн Засгийн газрын хуралдаанаар дотоодынхоо нөөцөд тулгуурласан нефтийн үйлдвэр барих асуудлыг оруулж, тогтоол батлуулжээ. Засгийн газраас хаана үйлдвэр барих, хэдэн үйлдвэр барих асуудлыг тодорхой болгож, ТЭЗҮ, байгаль орчны үнэлгээг хийх Ажлын хэсгийг Аж үйлдвэрийн яамнаас байгуулах юм байна. Нефтийн үйлдвэрийг говийн бүсэд буюу Сайншандын Зүүн баян-ийн хэсэгт 2 сая тонн хүртэлх хүчин чадалтай үйлдвэр, нөгөө нь зүүн бүсэд буюу газрын тосны нөөцтэй Дорнод аймгийн Тамсагт барих шийдэлд хүрчээ. Ирэх намар гэхэд нефтийн үйлдвэр барих сонирхолтой компаниудын дунд сонгон шалгаруулалт хийх, хөрөнгө оруулах санал тавих гэнэ. Нефтийн үйлдвэрээ барьж чадвал долларын ханш 1000 төгрөгт хүрэх боломжтойг Д.Эрдэнэбат сайд онцолсон. Тэрбээр "2020 он хүртэл экспортыг 8 тэрбум долларт хүргэж, импортыг 4 тэрбум долларт барьчихвал үнийн өсөлтийн тухай, валютын савлагааны тухай, ажлын байрны хомсдолын тухай ярихааргүй болно" гэв.
Энэ үеэр аж үйлдвэрийн хөгжлийн бүсийг таван үндсэн бүс, 27 дэд бүсэд хувааж хаана хүнд, хөнгөн, хөдөө аж ахуйн үйлдвэрлэл хөгжихийг тодорхой болгохоор ажиллаж байгаа гэнэ.
Жижиг дунд үйлдвэрлэл экспортод үр дүн өгөхгүй
Жижиг дунд үйлдвэрлэл нийтийг хамарсан ажлын байр бий болгож, импортыг орлох сайн талтай ч экспортод нөлөө үзүүлэхгүй байгааг салбарын сайд мэдээлсэн. Тиймээс жижиг дунд үйлдвэрлэлийн төслийг цаашид хэрэгжүүлэхдээ мөнгө цаг үрсэн, танил талаа хавчуулах асуудлыг таслан зогсоож, шаардлагад нийцсэн сайн төслийг санхүүлэх чиглэл барьж байгаа гэнэ. Өнөөдрийн байдлаар 3000 гаруй төслийн материал Аж үйлдвэрийн яаманд иржээ. Эдгээр төслүүдээс үр ашигтай байж чадах, мэргэжлийн боловсон хүчинтэй төслийг сонгон авахаас гадна зарим төсөл дээр ирэх сараас сонгон шалгаруулалт зарлахаар болжээ.
Аж үйлдвэрийн сайд Д.Эрдэнэбат мэдээлэл хийснийхээ дараа сэтгүүлчдийн сонирхсон асуултад хариулсан.
С.ОТГОН
0 сэтгэгдэл:
Post a Comment