-Ерөнхий сайд МАН-ын сайд нарын асуудлыг зөвшилцөхөөр Ерөнхийлөгчид санал хүргүүлжээ-
Ерөнхий сайд Ч.Сайханбилэг дөнгөж сая мэдээлэл хийлээ.
Ерөнхий сайдыг мэдээлэл хийхийн өмнө Засгийн газрын зарим гишүүнийг чөлөөлөх, томилох тухай тогтоолын төслийг УИХ-д өнөөдөр өргөн барина гэдгийг эх сурвалжууд мэдээлж байсан юм.
Харин Засгийн газрын зүгээс Ардчилсан нам, Монгол ардын намын хооронд 2014 оны 12 дугаар сарын 9-ний өдөр байгуулсан харилцан итгэлцэл, хамтын ажиллагааны гэрээний хэрэгжилтийг УИХ дахь Ардчилсан намын бүлэг болон Ардчилсан намын гүйцэтгэх зөвлөл хангалтгүй гэж дүгнэн, нэн даруй цуцлахаар шийдвэрлэсэнтэй холбогдуулан Монгол Улсын Засгийн газрын тухай тухай хуулийн 23 дугаар зүйлийн нэгдэх хэсэгт заасны дагуу, Монгол Улсын Засгийн газрын гишүүн, Шадар сайд У.Хүрэлсүх, БОНХАЖ-ын сайд Д.Оюунхорол, Сангийн сайд Ж.Эрдэнэбат, Барилга, хот байгуулалтын сайд Д.Цогтбаатар, Зам, тээврийн сайд Н.Төмөрхүү, Хөдөлмөрийн сайд С.Чинзориг нарыг үүрэгт ажлаас нь огцруулах саналыг зөвшилцөхөөр Монгол Улсын Ерөнхийлөгчид хүргүүлсэн байна.
"НАМЫН ДАРГА, ЕРӨНХИЙ САЙД ХАМТ БАЙХ ЁСТОЙ"
Ерөнхий сайд Ч.Сайханбилэгийн сэтгүүлчдэд өгсөн мэдээллийг бүрэн эхээр нь буулган хүргэж байна.
-"Улс үндэстний эрх ашгийг хангахын тулд хамгийн түрүүнд юу хийх ёстой вэ гэдэгт санал бодлоо хуваалцъя. Парламентын засаглалтай манайх шиг улсад УИХ-д байгаа олонх, олон суудал бүрдүүлж байгаа улс төрийн намын дарга нь Ерөнхий сайдын хувьд хамт байж ажиллах нь улс төрийн тогтвортой байдлыг хангахад хамгийн чухал үүрэг рольтой гэж үзэж байна. Ийм саналыг, ийм зарчмыг, зөвлөмжийг манай бүлгийн гишүүд надтай уулзахдаа хэлж байгаа. Монгол Улсын Үндсэн хууль, бусад хууль тогтоомжид нийцүүлж, мөн Ардчилсан намаас гаргасан шийдвэрээ хүндэтгэж, Ерөнхий сайдын хувьд дараах шийдвэрийг гаргаж байна.
Зургаан сайдыг огцруулах, чөлөөлөх асуудлын хувьд хуулийнхаа дагуу хувьд явж байгаа. Би танхимын сайд нартайгаа уулзсан. Сайд нарыг огцруулах асуудал нэгэнт улс төрийн намын шийдвэр гарсан учраас үйл ажиллагаа нь процессын дагуу үргэлжлээд явж байна. Засгийн газрын тухай хуулийн 23.1.1-д заасны дагуу энэ асуудлыг Ерөнхий сайдын хувьд Монгол Улсын Ерөнхийлөгчтэй зөвшилцөнө.
Зургаан сайдыг чөлөөлснөөр асуудал өөрөө шийдэгдэхгүй. Асуудал нээлттэй хэвээрээ байсаар байх болно. Тийм учраас миний түрүүний хэлдэг намын дарга, Ерөнхий сайд хоёр хамт байх ёстой гэдэг асуудлыг үндсэнд нь шийдэх ёстой. Одоо бид намрын чуулганаар ярих гэж байгаа Үндсэн хуулийн нэмэлт өөрчлөлт, энэ чиглэлийн хариултыг улс орон даяар гаргах ёстой гэж үзэж байгаа. Тийм учраас дөнгөж сая УИХ-ын дарга, Ардчилсан намын дарга З.Энхболдод Ерөнхий сайдын хувьд шаардлага хүргүүллээ. Энэ шаардлагад дээрх асуудлуудаа шийдэх үүднээс АН-ын Үндэсний зөвлөлдөх хорооны хуралдааныг наймдугаар сарын 3-ны УИХ-ын ээлжит бус чуулганаас өмнө зарлан хуралдуулж, намын дарга, Гүйцэтгэх засаглалын тэргүүн хоёр нэг байх асуудлыг шийдэх ёстой гэдгийг тусгасан. Үүнийг ҮЗХ-ны бүрэлдэхүүнээр шийдэх ёстой. Яагаад гэхээр ҮЗХ-ны бүрэлдэхүүн бол Гүйцэтгэх зөвлөлийн гишүүд, УИХ-ын гишүүд, ҮЗХ-дын гишүүд гээд улс орон даяар ард түмэнтэйгээ нүүр тулж явдаг хүмүүс учраас энэ шийдвэрийг гаргах ёстой гэж үзэж байна. Тиймээс маш яаралтай хугацаанд ҮЗХ-ны ээлжит бус хуралдааныг хуралдуулах шаардлагыг намын даргад хүргүүллээ".
АН-ЫН ДАРГАД ХҮРГҮҮЛСЭН ШААРДЛАГА
Тэрбээр мөн ярианыхаа эхэнд улс орны гадаад, дотоод нөхцөл байдал ямар байгааг ийн тодорхойлж ярив.
-"Гадаад орчинд уул уурхайн бүтээгдэхүүн, түүхий эдийн үнийн огцом бууралтууд үргэлжилсээр байгаа. Мөн гадаадаас оруулж ирж буй хөрөнгө оруулалтууд санасан хэмжээнд нэмэгдэхгүй, гадаадын хөрөнгө оруулагчид Монголын улс төрийн амьдралтай холбоотой үйл явцыг ажигласан, хүлээсэн байдалтай байна. Дотоод хүчин зүйлүүдийн хувьд бид энэ жилийн сүүлийн хагасын хувьд төсвийн алдагдлаа нөхөх, энэ чиглэлийн ажлуудаа эрчимжүүлэх шаардлагатай байна. Ургац хураах асуудал, малын хадлан тэжээл бэлтгэх асуудлууд, махны нөөцөө бэлтгэх, өвөлжилтийн бэлтгэлээ хангах энэ ажлууд биднийг хугацаа харгалзахгүйгээр, маш их хүчин чармайлтыг шаардсан байдалтай байна. Ийм нөхцөлд урагшаа явах асуудал буюу зарчмын асуудал, эрх ашгийн эрэмбийг зөв дараалах ийм шаардлага гарч ирж байгаа. Улс орны эрх ашиг, дараа нь улс төрийн намуудын эрх ашиг, хэсэг бүлэг, хувь хүмүүс, хувь улс төрчдийн эрх ашиг гээд бид бүхэн С.Зориг агсны хэлсэн эрх ашгийн эрэмбийг байнга санаж байх ёстой..."
Баттай эх сурвалжийн мэдээлснээр МАН-ын сайд нарын асуудлыг Ерөнхий сайд өнөөдөр УИХ-ын даргад өргөн барьсан боловч Тогтоолын төсөл бүрдэл хангаагүйгээс УИХ-ын дарга буцаасан байна. Ямартай ч Ерөнхий сайд энэ асуудлаар ойрын хугацаанд Ерөнхийлөгчтэй зөвшилцөнө гэдгээ өнөөдөр хэллээ. АН-ын Гүйцэтгэх зөвлөлөөс өнгөрсөн зургадугаар сард МАН-тай Засгийн газарт хамтран ажиллах гэрээгээ цуцлах шийдвэр гаргасан билээ.
Д.ЦЭЭНЭ
This entry passed through the Full-Text RSS service - if this is your content and you're reading it on someone else's site, please read the FAQ at fivefilters.org/content-only/faq.php#publishers.
0 сэтгэгдэл:
Post a Comment