Хөдөлмөрийн яамны харьяа 21 аймгийн Мэргэжил, сургалт үйлдвэрлэлийн захирал, мөн 21 аймаг, нийслэлийн есөн дүүргийн Хөдөлмөрийн хэлтсийн дарга нар намын харьяаллаас болж нэгэн зэрэг ажлаасаа чөлөөлөгдсөн тухай мэдээлэл цацагдаад байгаа. Дээрх асуудалд Хөдөлмөрийн сайд С.Чинзориг өнөөдөр сэтгүүлчдэд мэдээлэл хийлээ. Сайдын тушаалаар 50 гаруй хүн нэгэн зэрэг ажлаасаа чөлөөлөгдсөн шалтгааныг ингэж тайлбарлав.
Шинэчлэлийн Засгийн газар байгуулагдсаны дараа яамдын Төрийн нарийн бичгийн дарга нарыг томилсон байна. Ингэхдээ Төрийн жинхэнэ албан хаагчийн албан үүргийг түр орлон гүйцэтгэгчийг томилох тогтоолд өөрчлөлт оруулж, Төрийн нарийн бичгийн даргыг гаднаас иргэнээр томилох боломжтой байхаар өөрчилжээ. Үүнтэй холбоотойгоор Хөдөлмөрийн яамны Төрийн нарийн бичгийн даргын үүрэг гүйцэтгэгчээр н.Гантулга томилогдсон аж. Гэвч дээрх томилгоог хүлээн зөвшөөрөхгүй гэдэг гомдлыг өмнөх Төрийн нарийн бичгийн даргын үүрэг гүйцэтгэгч н.Ганцэцэг гаргаж, шүүхэд хандсан байна. Тэрээр Төрийн албаны зөвлөлөөс зарласан сонгон шалгаруулалтад тэнцэж, Төрийн нарийн бичгийн дарга болох боломжтой байсан ч н.Гантулгыг үүрэг гүйцэтгэгчээр томилсон нь шүүхэд хандах үндэслэл болжээ. Харин шүүх н.Ганцэцэгийн гомдол үндэслэлтэй байна гэж үзсэн төдийгүй Засгийн газрын тогтоол нь хууль зөрчжээ гэж үзсэн аж. Үүнтэй холбоотойгоор Засгийн газар 2013 оны дөрөвдүгээр сард өмнө гаргасан дээрх тогтоолоо хүчингүй болгож, хуучнаар нь мөрдсөн байна. Гэвч Хөдөлмөрийн яамны зүгээс аймаг, нийслэлийн Хөдөлмөрийн хэлтсийн дарга, Мэргэжлийн сургалт үйлдвэрлэлийн төвийн захирлуудыг жинхлээгүй, хуучнаар нь үүрэг гүйцэтгэгчээр ажиллуулсаар шинэ Засгийн газартай золгосон нь энэ аж. Тиймээс хуульд нийцүүлэх зорилгоор энэхүү тушаалыг гаргасан гэсэн тайлбарыг Хөдөлмөрийн сайд өглөө. Мөн тэрээр "Төрийн албаны тухай хуулиар 2 жилийн хугацаанд төрийн албыг түр орлон гүйцэтгэгчээр гүйцэтгүүлэх хууль эрх зүйн үндэс байхгүй. Энэ алдааг засалгүй, өдийг хүргэсэн байсан" гэлээ. Түүнээс дээрх асуудалтай холбогдуулж дараах тодруулгыг хийлээ.
-Засгийн газар байгуулагдаад гурван сар гаруйн хугацаа өнгөрч байна. Хууль зөрчсөн шийдвэрийг залруулахын тулд сайдаар томилогдсоныхоо дараахан засах арга хэмжээ аваагүй нь ямар учиртай вэ?
-Яагаад одоо авч байна вэ гэхээр Засгийн газар Төрийн албаны зөвлөлд хандаж, яамдын Төрийн нарийн бичгийн дарга нарыг сонгон шалгаруулах санал өгсөн. Үүний дараа манай яамны Төрийн нарийн бичгийн даргаар С.Магнайсүрэн гэдэг хүн томилогдсон. Энэ оны хоёрдугаар сарын дундуур Төрийн нарийн бичгийн дарга нарын сонгон шалгаруулалт зарлагдаж, Төрийн нарийн бичгийн дарга нар сонгогдсон. Энэнтэй холбоотойгоор Төрийн албаны зөвлөл гуравдугаар сарын 12-нд тогтоол гаргаж, манай яамны Төрийн албаны салбар зөвлөл эрх зүйн чадамжтай болсон. Энэ бүхний дараа л тушаал гаргахаас өөр аргагүй байсан л даа, хуулиа дагахаар. Нөгөө талаас эдгээр хууль бус томилгоог хүчингүй болгохдоо өмнөх шиг нь хууль зөрчсөн юм биш. Түр орлон гүйцэтгэгчийг томилохдоо Төрийн албаны хууль, журмын дагуу жишээ нь Хөдөлмөрийн хэлтэст ажиллаж байгаа мэргэжилтнээр нь сонгон шалгаруулалтын үр дүнд хэлтсийн дарга томилогдох хүртэл түр орлон гүйцэтгэж байх гэдэг тушаал гаргасан. Мэргэжлийн сургалт үйлдвэрлэлийн төвийн захирлуудыг чөлөөлөхдөө гаднаас бас хүн томилоогүй, одоо төвдөө ажиллаж байгаа сургалтын албаны дарга нарыг Мэргэжлийн сургалт үйлдвэрлэлийн төвийн захирлын сонгон шалгаруулалт явагдаж сонгогдох хүртэлх хугацаанд захирлын үүргийг түр үүрэг гүйцэтгэнэ гэдэг тушаал гаргасан. Энэ дөрвөн сардаа багтааж, сонгон шалгаруулалт явуулахыг Төрийн нарийн бичгийн даргад даалгасан байгаа.
-Гэхдээ намчирхаж ийн олноор нь халчихав уу л гэдэг шүүмжлэл нэлээд яригдаж байна?
-Намчирхсан бол сайдаар томилогдсоныхоо дараа хууль зөрчсөн шийдвэрийг хүчингүй болгоод түр орлон үүрэг гүйцэтгэгч нарыг томилж болох байсан. Би яагаад энэ асуудалд удаан хандсан бэ гэхээр хуулийнх нь дагуу Төрийн нарийн бичгийн дарга томилогдог, хуулийн дагуу Төрийн албаны салбар зөвлөл чадамжтай болог гэж хүлээсэн. Энэ бүхэн хууль ёсны дагуу болж, эрх зүйн чадамж бүрдсэн учраас тушаал гаргасан. Хуулийг хүндэтгэж, дотор нь ажиллаж байгаа ажилчдаар даргыг нь томилох хүртэл түр орлон гүйцэтгүүлэхээр шийдвэр гаргасан.
-Ажлаас чөлөөлөгдсөн хүмүүсийн цаана ар гэр амьдрал бий. Яах вэ, одоо?
-Сонгон шалгаруулалтыг ил тод зарлан явуулна. Мэргэжлийн сургалт үйлдвэрлэлийн төвийн захирлаар ажиллаж байсан, Хөдөлмөрийн хэлтсийн дарга нараар ажиллаж байсан түр орлон гүйцэтгэгч нар сонгон шалгаруулалтад орж өрсөлдөх эрх нээлттэй.
Хоёрт, сонгон шалгаруулалтад орохгүй төрийн албандаа үргэлжлүүлэн ажиллана гэвэл бид нэг л салбарын улсууд учраас ажлыг шийдэж өгөх зарчим барьж байна.
Г.ДАРЬ
0 сэтгэгдэл:
Post a Comment