2008 оны долдугаар сарын 1-ний үймээний үеэр галт зэвсгийн улмаас дөрвөн хүн амиа алдаж, гурван хүн шархадсан билээ........
.......... Үймээний үеэр цагдаа хүн буудсан, будаагүй гэх маргаан эцэс төгсгөлгүй үргэлжилж буй. Тэрхүү хар өдрийн үймээний үеэр баруун хөлөндөө буудуулсан хохирогч Ж.БАТЗАЯАТАЙ уулзаж ярилцлаа.
-Миний дүүгийн хөл нь гайгүй юу. Солонгос явж эмчлүүлсэн гэж сонссон юм байна?
-Гайгүй ээ, өнгөрсөн жил Энхтөр бид хоёр Солонгост очиж эмчлүүлээд ирсэн. Эмчилгээний үр дүнд таягтай босч явдаг болсон. Би чинь гурван жил гаруй эмнэлгийн орон дээр хэвтэрт байлаа шүү дээ. Энэ хугацаанд том, жижиг нийлсэн 20 гаруй хагалгаанд орсон.
-Эмч нар одоо ямар онош тавьж байх юм?
-Баруун хөл өвдгөөрөө нугарахаа больсон, хойшоогоо л тахийгаад байгаа. Цагаан сарын өмнө үзүүлэхэд эмч “Наад хөл чинь одоо нугарахгүй ээ. Хойшоо явуулахгүйн тулд түгжээ хийлгэчих” гэсэн. Түгжээ хийлгэчихээр чинь модон юм шиг л болчихно шүү дээ. Тэгэж байснаас тахир ч гэсэн ингээд байж байсан нь дээр байлгүй гэж бодох юм. Миний ойлгосноор баруун хөлний маань булчин ажиллагаагүй болсон юм шиг байна лээ. Гуя нь шилбэнээсээ нарийхан. Мөн хөлийн хуруунууд маань тэнийхгүй, атийгаад хатчихсан. Тийм болохоор байнга л хуруунууд цоорчихдог юм.
-Өнгөрсөн долоо хоногт цагдаагийн экс дарга нарт холбогдох хэргийн анхан шатны шүүх хурал болсон. Шүүх хуралд Энхтөр та хоёр сууж байсан. Дотор нь байсан хүний хувьд шүүх хурлын уур амьсгалыг хэрхэн дүгнэж байна вэ?
-Шүүх хуралд дөрвөн шүүгдэгч байсан. Тэдний нэг нь хурлын дундуур гараад явчихсан. Голд нь сууж байсан нүдний шилтэй ах их онгироо, бардам, сагсуу хүн шиг санагдсан. Шүүгчид рүү янз бүрийн үг хэлж загнаад л байсан. Харин тэр Хосбаяр гэдэг шүүгч их тэвчээртэй юм билээ. Гэхдээ энэ зөвхөн миний л дүгнэлт шүү.
-2008 оны долдугаар сарын 1-ний үймээний үеэр галт зэвсгийн улмаас гурван хүн шархадсан байдаг. Чи бол тэдний нэг нь. Хоёулаа ярианыхаа сэдвийг үймээний үе рүү хэвийлгэвэл яаж байна?
-Болохгүй юм байхгүй шүү дээ.
-Үймээний үеэр миний дүү яаж яваад галт суманд оногдчихсон юм бэ?
-Тэр үед би Хүүхдийн 100 дугаар дэлгүүрийн хажууханд найзынхаа ахын ундааны цехэд цагийн ажил хийдэг байсан юм. Үймээн болдог өдөр би оройн 22.00 цагийн үед ажлаа тараад гэр рүүгээ алхсан. Манай гэр Сансарт байдаг болохоор би яалт ч үгүй Сүхбаатарын талбайгаар дайрч өнгөрдөг. Тухайн үед би үймээн болж байгаа талаар юу ч дуулаагүй, мэдээгүй. Гэтэл Сүхбаатарын талбай дээр очтол энд тэндгүй хүмүүс бужигналдаад цаана нь гал гарч байсан. Хүүхэд л юм болохоороо сониуч зандаа хөтлөгдөн Сүхбаатарын хөшөөний хажуухнаас байдлыг хэсэг ажигласан. Өмнө нь тийм зүйлийг кинон дээрээс л харж байсан болохоор сонирхолтой байсан л даа. Гэтэл яг тэр үед талбайн хоёр талаас цагдаагийн бүхээгтэй машин ирж зогсоод дотроос нь урт мод барьсан цагдаа гарч ирж тэнд байсан хүмүүсийг толгой түрүүгүй цохиж, машиндаа чихэж эхэлсэн. Хүмүүс ч ийш тийшээ хуйларч зугтаагаад, би ч тэднийг дагаад гүйсэн. Ингээд байдал бишдэж байгааг ойгоод гэр рүүгээ харих гэтэл талбайн хойд хэсгээр маш олон цагдаа байсан. Тэгэхээр нь Дуурийн театрын урдуур явах санаатай тийшээ алхаж байгаад буудуулсан.
-Тийшээ ганцаараа алхаж байсан юм уу?
-Миний хажуугаар олон хүн гүйлдэж байсан. Би тэдний дунд байсан.
-Чамайг хэн буудсаныг харсан уу?
-Харсан. Каск зүүсэн, Police гэсэн бичигтэй хар хүрэм өмссөн 4-5 цагдаа гарч ирээд миний өөдөөс буудсан. Энэ үед миний баруун хөл мэдээгүй болж, өөрийн эрхгүй сөхөрч унасан. Тухайн үедээ би чулуунд оногдчихлоо л гэж бодсон. Тэгээд хөлөө барьж үзтэл нойт даагаад л нил цус болсон байсан.
-Тэгээд яасан?
-Яг тэрхэн зуур юу болсныг сайн санахгүй байна. Нэг сэргэтэл хэдэн цагдаа намайг тойроод зогсч байсан. Би тэднээс “Ах аа намайг авраарай, туслаарай. Би үхлээ” хэмээн тусламж гуйхад тэд “Ингээд үх чи” гээд толгой түрүүгүй дэвсч, зодсон.
-Хэдэн цагдаа байсан бэ?
-5-6 цагдаа байсан. Тэдний хамгийн өндөр нь намайг “Үх чи” гээд зодоод байсныг тод санаж байна.
-Царайг нь санаж байна уу?
-Шоконд орсон болохоор сайн санахгүй байна. Ямартай ч каск зүүсэн Police гэсэн бичигтэй хувцас өмссөн цагдаа нар байсан. Ингээд дахиад ухаан алдсан юм шиг байгаа юм. Нэг сэртэл эмнэлэгт байсан.
-Цагдаа хүн буудаагүй гэж цагдаагийн экс дарга нар болоод тэдний өмгөөлөгчид удаа дараа хэлдэг. Магадгүй тухайн үед цагдаа биш, өөр хүн чамайг буудсан байх магадлалтай юу?
-Би юуг баталж чадна гээч?
-Юуг?
-Цагдаа хүн буудсан гэдгийг л баталж чадна. Би хоёр нүдээрээ харсан учраас үүнийг итгэлтэй хэлж байна. Хэрвээ цагдаа биш хэн нэгэн хөндлөнгийн этгээд намайг буудсан гэж бодъё л доо. Тэгвэл намайг шархадчихаад цагдаа нараас тусламж гуйгаад хэвтэж байхад тэд яагаад надад анхны тусламж үзүүлээгүй, зодсон юм бэ гэдэг асуулт гарч ирж байгаа биз дээ. Үнэхээр л цагдаа нар намайг буудаагүй юм бол тухайн үед тэд гэмт этгээдийг хайх байсан шүү дээ. Одоо болохоор цагдаа нар хүн буудаагүй л гэх юм. Тэд яаж ингэж худал хэлж чадаж байна аа. Үнэхээр гайхаж байна. Шударга шүүх гэж байдаг бол энэ хэргийг үнэн зөвөөр шийдэж өгөөсэй.
-Миний дүү буудуулах үедээ хэдэн настай байсан билээ?
-Би 1991 онд төрсөн. Тэр үед би дөнгөж 17-хон настай, есдүгээр ангиа төгсч байсан. Өөрөөр хэлбэл, дөнгөж ирээдүйдээ хөл тавих гэж байсан үе. Гэвч 2008 оны долдугаар сарын 1-ний гэх тэр хар өдөр миний амьдарлыг, миний мөрөөдлийг орвонгоор нь эргүүлсэн. Би сонгууль гэж мэдэх ч үгүй. Саналаа ч өгч үзээгүй байсан шүү дээ.
-Миний мөрөөдлийн орвонгоор нь эргүүлсэн гэлээ. Мөрөөдөл биелдэг шүү дээ. Миний дүү мөрөөдлөөсөө хуваалцаач?
-Би дуучин болох мөрөөдөлтэй байсан. Багаасаа л дуулдаг байсан. Саяхан ТВ-8 телевизийн Monster шоунд оролцсон л доо. Тэгээд I,II шатандаа тэнцээд III шатандаа өөрийнхөө хүсэлтээр оролцоог үй.
-Яагаад?
-Хоёрдугаар шатанд л шүүгчдийн хандлага өөрчлөгдсөнийг анзаарсан. Хэчнээн сайн дуулдаг байлаа ч гэсэн над шиг хөл муутай хүнийг үзэгчид хүлээж авахгүй шүү дээ. Өөрөөр хэлбэл, тайзны соёл, гоо үзэмж талаасаа өөрийгөө тэнцэхгүй гэдгийг мэдсэн учраас сүүлийн шатандаа оролцоогүй. Саяхан бас “Камертон 2” шоунд оролцохоор бүртгүүлэх гэж байгаад хаалган дээрээс нь буцсан. Хэчнээн сайн дуулдаг байлаа ч миний эрүүл мэнд тэнцэхгүй шүү дээ.
-Өөдрөг байхад бүтэхгүй зүйл гэж байхгүй шүү дээ?
-Тийм ээ, энэ үнэхээр үнэн үг шүү. Эгч ээ, үнэнийг хэлэхэд би өнгөрсөн дөрвөн жилийн хугацаанд амьдрах итгэлгүй болсон байсан. Дөрвөн жил эмнэлгийн орон дээр тарчлахдаа юм юм л бодож байлаа. Ер нь хүний үзээгүй бүхнийг үзсэн гэж хэлж болно. Намайг буудуулахаас тавхан сарын өмнө аав минь бурхан болсон юм. Удалгүй би буудуулж, манай гэр бүлийнхэн үнэхээр хүнд цохилтод орсон. Ээж минь барилгын засал чимэглэл хийдэг юм. Өдөр шөнөгүй шавар зуурч зуурч олсон хэдэн төгрөгөөрөө надад эм тариа авдаг байв. Урьд нь манай гэрийнхэн цөцгийтэй талх иддэг байсан бол намайг буудуулснаас хойш цөцгийтэй нь бүү хэл дан талх ч олдохоо больсон. Миний нэг сарын эмчилгээнд л гэхэд 4-5 сая төгрөг зарцуулдаг байсан юм шүү дээ. Гэхдээ энэ бүхнийг миний ээж даван туулж, миний төлөө үр хүүхдийнхээ төлөө бүхнээ зориулдаг юм. Солонгост эмчлүүлж ирээд би суга таягтай алхдаг болсон.
Ингээд ар гэрийнхнийгээ хэр удаан зовоох билээ, ямартай ч хөл дээрээ боссон юм чинь ямар ч хамааг үй ажил хийе гэж бодсон л доо. Тэгээд суга таягтай “Шуурхай зар”, “Зар мэдээ” сонин бариад л өдөржин ажил хайж алхдаг байсан. XIII хорооллоос Х хороолол хүртэл алхах бол энүүхэнд. Суга таягтай автобусанд ороход хүмүүс над руу сүрхий хараад, би тэрнээс нь ичдэг байсан л даа. Харин одоо бол ичихээ больсон.
-Ажил хайж байхад хүмүүсийн хандлага ямар байна вэ?
-Би өнгөрсөн жил худалдагч, няравын 30 хоногийн сургалтад суусан юм. Тэгээд худалдагч, няравын мэргэжил эзэмшсэн. Хажуугаар нь бие дааж Photoshop болон Office-ын программуудыг сурсан. Хоёр сар тасралтгүй ажил хайсан л даа. “Номин” их дэлгүүрийн хивсний тасагт худалдагч авна гэсэн зарын дагуу анкет бөглөж өгөхөд хоёр хоногийн дараа дуудсан. Ингээд очиж уулзахад хүний нөөцийн менежер нь намайг ажилд авъя, маргаашаас ажилдаа ороорой гэв. Би ч хөл газар хүрэхгүй баярлаад босоод явтал нөгөө эгч чинь гэнэт дуу алдаад “Чиний хөл чинь ийм юм уу” гэсэн. Тэгэхээр нь би “тийм ээ” гэтэл тэр эгч “Уучлаарай, манайх худалдааны байгууллага болохоор хөл муутай хүн ажилд авахгүй ээ” гэсэн. Мөн түргэн хоолны газарт маркетингийн менежерээр ажилд орох гээд анкет бөглөөд ярилцлагад ороход бас л ийм зүйл болсон. Би таван байгууллагад анкет бөглөөд ярилцлагад ороход бүгд намайг авъя гэсэн. Гэвч босоод явахад бүгд миний хөлийг хараад авахаа больж билээ. Гэхдээ намайг ажилд авъя гэсэнд нь би үнэхээр баярладаг.
-Үймээний үеэр буудуулаад ийм болсон гэдгээ тэдэнд учирлаж хэлсэн үү?
-Би хүнээс юм гуйхыг хүсдэггүй, өөрийнхөө чадлаар явахыг л хичээдэг. Нэг үгээр хэлбэл, өрөвдүүлэхийг хүсээгүй юм. Тиймдээ ч тэдний хэнд нь ч энэ тухай хэлээгүй. Хамгийн сүүлд “Номин” их дэлгүүрт очиж ярилцлаганд ороод “Ийм хөлтэй хүнийг ажилд авахгүй” гэдгийг сонсоод үнэхээр сэтгэлээр унасан. Тэгээд гараад явж байтал нэг хөл муутай ахтай тааралдсан. Тэр ах гудамжинд тамхи, чихэр зардаг юм байна лээ. Би ч таягаа тулчихсан тэр ахын хажууд очиж суугаад “Ах аа нэг чихэр авъя” хэмээн дуу муутайхан хэлэхэд тэр ах “Яасан миний дүү” л гэж байна. Тэгэхээр нь би “Яагаа ч үгүй ээ, зүгээр л” гэхэд тэр ах “Ах нь чамд нэг юм хэлэх үү. Би ч гэсэн хөл муутай шүү дээ” гэв. Би хариуд нь “Харин тийм байна, анзаарсан” гэхэд тэр ах “Чи сэтгэлээр уначихсан байна шүү дээ.
Ах нь ч гэсэн сэтгэл санаагаар унадаг байсан. Харин үүнээс гарах аргаа ах нь өөрөө олсон л доо” гэв. Үүнийг сонсоод миний нүд сэргээд “Тэрийгээ заагаад өгөөч” гэхэд “Чи зүгээр л өөрийгөө хүн гэж бод. Эрүүл болно гэдэгт итгэ. Олонтой яв, хүмүүстэй харилц” гэсэн. Тэгэхээр нь би “Баярлалаа ах аа” гээд хэчнээн их урам орсон гээч. Урьд нь би найзуудтайгаа гадуур гардаггүй байсан. Харин тэр ахын үгийг сонсоод өөртөө итгэлтэй болж найзуудтайгаа уулзаж, хааяа гадуур гардаг болсон. Үнэхээр сэтгэл сэргэдэг юм билээ. Ингээд байж байтал “Монос” компанид ажилд явна гэсэн зар явсан. Тэгээд очих уу, байх уу гэж хэсэг бодсоны эцэст очиж
анкет бөглөсөн л дөө. Гэтэл ганц хоёр хоногийн дараа захирал нь утасдаад намайг ээжтэйгээ хүрээд ир гэсэн. Тэгээд ээж бид хоёрыг очиход намайг ажилд авъя гэсэн. Ямар их баярласан гээч. Ингээд би өнгөрсөн оны долдугаар сарын 1-нд “Монос” компанид ажилд орсон.
-Энд ямар албан тушаал дээр ажиллаж байгаа вэ?
-Агуулахын менежерээр ажиллаж байна. Их ч зүйл сурч байна. Энэ ажилд орсноос хойш надад амьдрах итгэл төрсөн. Манай хамт олон үнэхээр сайхан сэтгэлтэй, сайн хүмүүс. Надад үнэхээр их сэтгэлийн дэм өгч, анхаардаг. Бүгд л намайг гэсэн сэтгэлтэй. Би одоо амьдралыг гэрэл гэгээтэйгээр харж, өөдрөгөөр сэтгэдэг болсон. Одоо бол юунд ч гутарч, шантрахгүй. Би одоо дээд сургуульд шалгалт өгөхөөр бэлдэж байгаа.
-Ямар чиглэлээр?
-Удирдлага менежмент юм уу гадаад хэл. Англи хэл бие даан сурч байгаа. Үг цээжлэх гэж нэлээн юм болж байна. Би нэг зүйл хэлж болох уу.
-Бололгүй яах вэ?
-“Монос”-ын хамт олон хүнийг хүн гэдэг утгаар нь хүлээж авч, намайг тахир дутуу гэж хэзээ ч гадуурхдаггүй. Алхам тутамд минь урам зориг өгч байдаг та бүхэндээ үнэхээр их баярлаж явдаг шүү гэж хэлмээр байна. Та үүнийг заавал оруулаарай.
Ц.ЭРДЭНЭЦЭЦЭГUndesnii shuudan
Гэлээ ч уучилана СОА шинэ кино 73 -р анги
Говь-Алтай аймгийн Засаг дарга Ш.Амгаланбаяр. Бид өмнө нь эрхэм засаг дарга эрх мэдлээ хэтрүүлэн ашиглаж ХХААХҮЯ-аас хөдөө аж ахуйг нь дэмжих зорилгоор трактор комбайн аваарай гэж өгсөн 200 сая төгрөгийн 100 саяыг нь өөрийн компанидаа шилжүүлсэн тухай мэдээлж байсан. Мөн барилгын зураг төслийн ажил гүйцэтгэх тендерийг өөрийн компанид олгосон тухай. Бид Говь-Алтай аймгийн засаг дарга Ш.Амагаланбаяраас энэ тухай тодруулахад намайг шалгаж байгаа нь үнэн ч гэсэнгүй, шалгаагүй ч гэсэнгүй. Харин “Би АТГ намайг шалгахаас айх юм байхгүй” гэж хариулж байна.
Харин Архангай аймгийн Засаг дарга Ё.Баатарбилэгийн тухайд Архангай аймгийн Цэнхэр суманд алт олборлож буй компаниудын хууль бус ажиллагааг өөгшүүлж авлига авсан хэргээр шалгагдаж байгаа тухай мэдээлэл цацагдаж байна. Энэ тухай Аймгийн засаг дарга Ё.Баатарбилэгийн хэвлэлийн төлөөлөгч Б.Энхсайханаас лавлахад “Харин ийм мэдээлэл гараад байх юм. Ямар ч үндэслэлгүй мэдээлэл. Бид өчигдөр албан ёсоор АТГ-т албан бичиг илгээсэн. Агуулга нь танайх албан ёсоор олон нийтэд энэ хүн шалгагдаагүй гэдгийг хэлж дугараач ээ гэсэн утгатай. Хаанаас ийм мэдээлэл гараад байдаг юм ойлгохгүй байна” гэсэн хариулт өгч байна.
Булган аймгийн Засаг дарга М.Оюунбат. Түүнийг Булганы Хишиг-Өндөр сумын Засаг дарга Г.Ганхуягийн хамт “UFC” групп тэргүүтэй хэд, хэдэн компанид хууль бусаар их хэмжээний газар олгосон хэмээн сэжиглэж байгаа юм. Энэ тухай “UFC” группээс тодруулахад “Манайх 2006 онд Булган аймгийн Хишиг-Өндөр суманд биш Хутаг-Өндөр суманд аялал жуулчлалын зориулалттай газар авах нь авсан. Энэ тухай АТГ-аас шалгасан юм алга. Аялал жуулчлалыг хөгжүүлье гэж яриад байгаа биз дээ. Газар авахаар л бүх юм хууль бус болдог гэж юу байхав дээ” гэсэн хариулт өгч байна. Харин Булган аймгийн засаг дарга М.Оюунбатаас тодруулахад “Намайг шалгасан юм алга. Тэгээд ч тэр буруутгаж бичээд байгаа юм чинь надтай биш сумын засаг даргатай хамаатай юм биш үү” гэж хариуллаа. Аймгийн засаг дарга болонгуутаа л хүн дарамталсан бүр зодож танхайрсан хэрэгт холбогдож байсан Говьсүмбэр аймгийн Засаг дарга Ж.Баянмөнхийн хувьд Шивээговь сум дахь орон нутгийн өмчит “Илчлэг шивээ” үйлдвэрийн газрыг найздаа хувьчлахын тулд өмч хувьчлалын комисс болон доод тушаалтнууддаа хууль бус шаардлага тавьж, дарамталсан гэх үндэслэлээр буруутгажээ. Энэ тухай өөрөөс нь тодруулах боломж олдсонгүй. Харин АТГ-ын Тамгын газрын дарга Ч.Өнөрбаяр Говьсүмбэр аймгийн засаг дарга Ж.Баянмөнх АТГ-т шалгагдаад буруутай нь тогдоогдсон тухай хэлж байна.
Дорноговь аймгийн Засаг дарга П.Ганхуяг болон Замын-Үүд сумын Засаг дарга М.Баянмөнх нарыг АТГ шалгасан гэх мэдээлэл нэг хэсэг гарсан. Тэднийг газрын наймаа хийсэн, хөрөнгө орлогоо нуун дарагдуулсан хэмээн буруутгаж байжээ.
Дорнод аймгийн Засаг дарга Ц.Жанлав. Гэрийн бүлийнх нь хүмүүсийн нэр дээр байдаг хоёр орон сууц, хөрөнгө орлогын мэдүүлэг дээрээс хасагдсан барилгуудаа худалдаж олсон мөнгө болон өөрийн эзэмшлийн “Дорнод бөхийн өргөө”-ний ашгийг худал мэдүүлсэн гэх үндэслэлээр АТГ түүнийг шалгаж байна. Ц.Жанлавтай холбоотой мэдээлэл үүгээр дуусахгүй. Газрын наймаа хийсэн гэх мэт олон асуудал түүний хавтаст хэргийг үргэлжлүүлж байгаа бололтой. Өөрөөс нь тодруулах гэсэн боловч хариулхаас татгалзлаа.
Орхон аймгийн Засаг дарга асан Д.Оюунбат. Түүнийг огцруулах асуудал яригдаж эхлэх үед тэрбээр “Олон хүний булхай, луйврыг илчилнэ” гэх агуулгатай зүйл хэлж, нэлээд шуугиан тарьж байв. Гэвч төд удалгүй АТГ-аас Д.Оюунбатыг шалгаж эхэлсэн нь тодорхой болсон юм. Засаг дарга байх хугацаандаа хоёр орчим тэрбум төгрөг төсөвлөж болох байсан цэнгэлдэх хүрээлэн барих төсөлд таван тэрбум төгрөг зарцуулсан. Орхон аймагт зарласан гурван тендерийг шударга бусаар явуулсан. “Бурхан багшийн сэрэг дүр” босгох ажлыг “Тод жаргал” компанид хууль бусаар хариуцуулсан гэх мэт олон зөрчил илэрсэн гэх. Байнга шахуу хэл амны бай болж явдаг энэ эрхэмийн тухайд мөн л өөрөөс нь лавлах боломж олдсонгүй. АТГ-аас авсан мэдээлэлээр бол мань хашир шалгагдсан нь үнэн бөгөөд буруутай нь тогдоогдсон аж.
Өвөрхангай аймгийн Засаг дарга Д.Тогтохсүрэн. Түүнийг орон нутгийн өмчит компанийн үйл ажиллагаанд хяналт тавихаа больж, “Баянтээг” төрийн өмчит компанийн захирал, Н.Ганболдтой хамтарч хууль бус үйлдэл хийсэн гэх үндэслэлээр шалгаж эхэлжээ. Мөн аймгийн төвийн “А” зэрэглэлийн бүсийн газрыг танил тал харж өгсөн, ашигт малтмал олборлож буй компаниудаас их хэмжээний хөрөнгө барьцаалж авсан гэх үндэслэлээр буруутгасан байна. Мөн Засаг даргын Тамгын газрын хуулийн хэлтсийн дарга болон Мэргэжлийн хяналтын газрын даргыг албан тушаалаа хэтрүүлэн ашиглаж, хууль бусаар томилсон хэмээн буруутгажээ. Цаашилбал, Занабазарын эсрэг дүр бүхий хөшөө, цэцэрлэгт хүрээлэн байгуулах ажлын төсвийг хэтрүүлсэн гэж үзсэн байна. Тэрээр бидэнд хамгийн дэлгэрэнгүй тайлбар өгсөнийг бүрэн эхээр нь хүргэж байна.
Увс аймгийн Засаг дарга Э.Цасчихэр. Одоогоос хоёр жилийн өмнө Увс аймагт барихаар төлөвлөсөн Нарийн голын 325 км, Тээлийн голын 75.3 км гүүрийн барилгын ажлыг өөрийн мэдлийн “Мөнхжим” компанид хариуцуулсан хэмээн Э.Цасчихэрийг буруутгасан юм. Түүнчлэн төрийн албан хаагчдын орон сууц барихдаа анх таван давхар байхаар төлөвлөсөн байсныг дөрвөн давхар болгож, зөрүү мөнгийг нь хувьдаа завшсан гэж үзжээ. Одоогоор түүнтэй холбоо барьж чадсангүй. Гэхдээ энэ тухай эргэж нягтлах болно.
Ховд аймгийн Засаг дарга Г.Нямдаваа. Дөргөний усан цахилгаан станцын цахилгааны үнийг 2-3 дахин нэмэгдүүлж ашиг олсон, ашигт малтмалын орд бүхий газрыг хууль бусаар худалдахыг оролдсон, авлига авсан гэх үндэслэлээр Г.Нямдавааг буруутгаж, АТГ-аас шалгаж эхэлсэн гэсэн мэдээллийн дагуу өөрөөс нь тодруулга авахад “ Би цахилгааны үнийг нэмнэ гэж ер нь юу байхав дээ. Надад АТГ шалгагдаж байгаа юм байхгүй. Харин аймгийн АН-ын дарга н.Пүрэвдоржийн зээлийн талаар АТГ-аас асуусан. Тэр зээлийг нь ИТХ-аар хэлэлцэж шийдвэр гаргаад надад үүрэг болгосон зүйл.” Тэр нь ямар компани юм бол, хэдий хэмжээний зээлийн асуудал вэ гэсэн асуултын хариуд “ Аймгийн АН-ын дарга н.Пүрэвдоржийн “Баруун Монгол интернешнл” гэдэг компанид 350 сая төгрөгийн зээл өгсөн. Түүнийг нь аймгийн ИТХ-аар баталж гаргасан шийдвэрийн дагуу л өгсөн. Тэрнээс биш би цахилгааны үнийг нэмээд тэрнээс болж намайг шалгасан энэ тэр юм байхгүй. Сонгууль дөхөж байгаа болхоор энэ мэтчилэн гүтгэлэгийн чанартай юмнууд их явж байна. Бид энэ тухай судалж байгаа. Энэ үйлдэл нь УИХ-ын тухай хуулийн 35.1-д заасан нэгнийгээ гүтгэж гүжирдэхгүй байх хуулийг зөрчиж байна. Мөн АТГ-т албан бичиг илгээсэн байгаа.” гэсэн хариулт өглөө.
Хөвсгөл аймгийн Засаг дарга Л.Цэрэнжав. Аймгийнхаа 80 жилийн ойг хэтрүүлэн тэмдэглэсэн гэх үндэслэлээр АТГ-т шалгуулж байна. Засгийн газраас тогтоож өгсөн 10 сая төгрөгийн төсвийг хэтрүүлж, нэг тэрбум төгрөгийн зардал гаргаж баяр тэмдэглэсэн хэмээн түүнийг буруутгаж байгаа юм. Энэ тухай тодруулахад “Өө, наадах чинь захиалгатай юм яваад байгаа. Одоо бараг 3-4 сар болж байна. Аймаг ямар юмныхаа тэрбум төгрөгөөр баяр тэмдэглэх вэ дээ” гэсэн юм. “Та захиалгат гэж хэллээ. хэн захиалаад байгааг нь хэлж чадах уу?” гэж асуухад “Харин хэлж мэдэхгүй байна” гэсэн юм.
